Hjartnæm ræða Alfreðs Gíslasonar þjálfara þýska karlalandsliðsins í handknattleik er sögð hafa gert gæfumuninn fyrir mikilvægan sigur Þýskalands á Serbíu í lokaumferð A-riðils Evrópumótsins í Herning í Danmörku á mánudagskvöld.
Þýski miðillinn Bild greinir frá því að ræða Alfreðs á fundi fyrir leikinn hafi hitt beint í hjartastað leikmanna, sem hafi staðið upp og klappað að henni lokinni.
Alfreð fagnaði sigri og sæti í milliriðli – lögðu Spánverja
Bild skýrir frá því að á hádegisfundum þýska liðsins sitji Alfreð venjulega andspænis leikmönnum sínum. Nú hafi hann hins vegar staðið upp og látið nokkur vel valin orð falla.
Pressan á Alfreð og leikmenn frjálsir
Inntakið í ræðu Alfreðs var að hann tæki fulla ábyrgð á þeirri gagnrýni sem beindist að Alfreð og liðinu eftir óvænt tap fyrir Serbíu í umferðinni á undan.
Íslenski þjálfarinn skyldi taka alla pressu á sig því leikmenn þyrftu að spila með auknu frjálsræði, þar sem stress drægi úr sköpunarkrafti. Gegn ákafri vörn Spánverja þyrfti hugmyndir, hugrekki og andlegt frelsi. Pressa og streita myndi koma í veg fyrir að þýska liðið gæti spilað með þeim hætti.
Skilaboðin voru skýr, Alfreð tæki á sig alla pressu en leikmenn fengju fullt frjálsræði á vellinum. Venjulega eftir liðsfundi sem þessa fara leikmenn beint í hádegismat. Að þessu sinni stóðu leikmenn upp og klöppuðu, fyllilega reiðubúnir í leikinn mikilvæga sem vannst.
Þýskaland vann riðilinn með sigrinum og tekur með sér tvö stig í milliriðil 1, sem hefst á morgun klukkan 14:30 með leik Þýskalands og Portúgal í Herning.
