„Við höfum náð stóru markmiði með þessum sigri. Við vorum einu marki frá milliriðli á HM fyrir tveimur árum en nú er þetta komið,“ sagði glaðbeitt Katrín Tinna Jensdóttir landsliðskona í viðtali við handbolta.is eftir sigurinn á Úrúgvæ á HM í dag, 33:19. Með sigrinum tryggði íslenska landsliðið sér sæti í milliriðlum eins og Katrín Tinna sagði.
„Ef við hefðum ekki mætt af krafti í þennan leik hefði það getað orðið vandamál. Leikmenn Úrúgvæ eru litlar og snöggar og erfiðar að eiga við ef maður er ekki með hugann við það sem á að gera. Við gerðum þetta mjög vel, að mestu leyti,“ sagði Katrín Tinna sem var sérlega ánægð með fyrri hálfleikinn í dag en þá má segja að íslenska liðið hafi gert út um viðureignina. Staðan var 17:7 í hálfleik.
„Ég hlakka til að mæta þremur sterkum liðum í milliriðli. Næst á dagskrá er að færa sig innan Þýskalands og takast svo á við næstu andstæðinga,“ sagði Katrín Tinna Jensdóttir.
Lengra viðtal við Katrínu Tinnu er að finna í myndskeiði hér fyrir ofan.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
Öruggur sigur á Úrúgvæ – sæti í milliriðlum – fyrsti leikur á þriðjudag
