- Auglýsing -
„Það er ekki hægt að koma hingað og ganga að sigrinum vísum en vissulega komum við hingað til þess að vinna og ég er því hrikalega ánægður með að fara héðan með bæði stigin,“ sagði Einar Jónsson, þjálfari Fram, eftir að lið hans marði sigur á Gróttu, 24:23, í 3. umferð Olísdeildar karla í Hertzhöllinni á Seltjarnarnesi í kvöld.
„Við vorum flottir því það er ógeðslega erfitt að leika gegn Gróttuliðinu. Það er vel skipulagt og erfitt viðureignar. Ég er í sjöunda himni að vinna þá því ekkert lið er að koma hingað í vetur til þess að eiga auðveldan leik,“ sagði Einar ennfremur en lið hans hefur núna fjögur stig eftir tvo sigurleiki í röð.
Einar tók undir með blaðamanni að vafalust hafi leikurinn ekki verið mikið fyrir augað. „Maður verður að leika agaðan leik gegn Gróttu til þess að eiga við þá, leika eins og þeir. Svona er margir leikir í deildinni. Valur kom hingað og vann með einu marki, 22:21. Grótta er með hörkulið sem á eftir að fá mörg stig á heimavelli í vetur,“ sagði Einar Jónsson glaður í bragði eftir sigurinn í Hertzhöllinni.
- Auglýsing -
