„Allt frá því að dregið var í riðla í vor höfum við fundið fyrir gríðarlegum áhuga meðal fólks að fylgja íslenska landsliðinu á EM í Búdapest í janúar. Ég á því von á að Íslendingar fjölmenni og styðji við bakið á strákunum okkar enda um frábæra fyrstu ferð að ræða fyrir marga eftir kóvíd,“ sagði Kjartan Vídó Ólafsson markaðsstjóri Handknattleikssambands Íslands, í samtali við handbolta.is en loksins getur HSÍ hafið sölu á aðgöngumiðum á leiki íslenska karlalandsliðsins á Evrópumótinu sem fram fer í Búdapest janúar.
Ódýrari miðar og betri sæti
Að sögn Kjartans hefur HSÍ þegar fengið 500 dagpassa á leikdaga Íslands í riðlakeppninni 14., 16. og 18. janúar gegn Portúgal, Hollandi og Ungverjum í þessari röð. Passi, sem gildir á alla þrjá leikdagana, kostar 20.000 kr fyrir fullorðna og 15.000 kr fyrir börn. Er það umtalsvert lægra en á EM karla í Svíþjóð í janúar 2020. Barnamiðar gilda fyrir þá sem eru yngri en 18 ára.
Miðarnir sem HSÍ hefur fengið úthlutaða að þessu sinni eru í flokki tvö í tveimur samliggjandi hólfum 113 og 213 en hlekkur á teikningu af íþróttahöllinni er að finna hér fyrir neðan. Miðarnir eru nær vellinum en þeir sem HSÍ fékk úthlutað á EM 2020 í Svíþjóð.
Kort af íþróttahöllinni í Búdapest og hólfaskiptingu.
Miðapantanir hjá HSÍ
Miðapantanir fara fram í gegnum netfangið [email protected]. Að sögn Kjartans eru áhugasamir beðnir um að senda inn nafn, kennitölu, síma og netfang ásamt fjölda miða á hvern leik Íslands. Tekið er við miðapöntunum til 10. september svo það er um að gera að hafa hraðar hendur. Með því að fara í gegnum HSÍ með miðakaup er hægt að tryggja að Íslendingar sitji sem flestir saman á leikjunum.
Íslenskir áhorfendur eru eftirsóttir
Kjartan segir íslenska áhorfendur hafa vakið athygli stórmótum á síðustu árum fyrir jákvæðni, samstöðu og gleði. Fyrir vikið setji þeir skemmtilegan svip á mótin og séu eftirsóttir af mótshöldurum.
„Að undanskildu HM í byrjun þessa árs sem var lokað áhorfendum þá hafa Íslendingar fjölmennt á síðustu stórmót strákanna okkar og sett frábæran svip á leikina svo eftir hefur verið tekið og HSÍ fengið mikið hrós fyrir jákvæða og skemmtilega framkomu Íslendinga og nánast verið beðið um að fá sem flesta,“ segir Kjartan.
Frábær fyrsta ferð eftir kóvíd
„Nú þegar aðeins er að létta til í kóvídinu þá er þetta hreint út sagt alveg kjörið að fjölmenna til Búdapest í janúar með strákunum okkar. Borgin er frábær, stórkostleg ný keppnishöll sem rúmar 20 þúsund áhorfendur og rífandi stemning ekki síst þegar strákarnir okkar mæta heimamönnum í ungverska landsliðinu 18. janúar. Það verður pottþétt uppselt á þann leik og því um að gera að tryggja sér miða í tíma. Það er svo sannarlega veisla framundan í janúar,“ sagði Kjartan sem hreinlega iðar í skinninu af eftirvæntingu.
Koma upp heimavelli í Búdapest
Eins og á undanförnum stórmótum þá mun HSÍ koma upp heimavelli fyrir íslensku stuðningsmennina í samvinnu við veitingastað í Búdapest þar sem komið verður saman fyrir leiki. Kjartan segir að unnið sé að þeim málum núna og gengið verði frá samkomulagi við veitingastað í borginni í næsta mánuði. Veitingastaðurinn verði heimavöllur Íslendinga í Búdapest meðan mótið stendur yfir. Væntir Kjartan þess að jafn vel takist til við val á stað og fyrir EM 2020 í Malmö.
Leikir liðsins í riðlakeppninni EM eru eftirfarandi:
14.janúar Portúgal – Ísland.
16.janúar Ísland – Holland.
18.janúar Ísland – Ungverjaland.
Kort af íþróttahöllinni í Búdapest og hólfaskiptingu.
