Það er nú ljóst að Íslandsmeistarar ÍBV og Valur leika báða leiki sína í 2. umferð Evrópubikarkeppninnar í handknattleik á útivöllum.
Eyjamenn leika báða leiki sína gegn Red Boys Differdange í Lúxemborg; 14. og 15. október. Leikið verður í Center Sportif í Differdange, sem er suð vestur af borginni Luxemborg, við frönsku landamærin.
Valsmenn leika báða leiki sína gegn Pölva Serviti, frá samnefndum bæ í suð-austurhluta Eistlands. Leikið verður í Mesikäpa-höllinni 14. og 15. október.
Íslenskt lið hefur aldrei áður leikið gegn liði frá Eistlandi í Evrópukeppni
![](https://handbolti.is/wp-content/uploads/2023/09/20211016-DSC_1282.jpg)
100. Evrópuleikur FH
FH-ingar leika sína leiki gegn serbneska liðinu, heima og heiman í sömu keppni. Þeir leika fyrst heima gegn Partizan Belgrad, í Hafnarfirði 14. október, en síðan í Belgrad 21. október. Sá leikur er 100. Evrópuleikur FH, sem lék fyrst í Evrópukeppninni gegn norska liðinu Fredensborg 1965 í Laugardalshöll, 19:15, og síðan aftur í Höllinni, 16:13.
Þess má geta til gamans að Valur lék síðast gegn liði frá Serbíu í Áskorendakeppninni, Challenge Cup, tímabilið 2016-2017 og vann þá báða leikina gegn HC Sloga Pozega 30:27 og 29:26. Króatinn Josip Juric Gric skoraði 14 mörk í fyrri leiknum.
Afturelding leikur gegn norska liðinu Nærbø í Noregi 15. október, en í Mosfellsbæ 21. október í sömu keppni. Nærbø er frá samnefndum bæ fyrir sunnan Stavanger í vestur-Noregi.
Íslensk lið hafa 30 sinnum leikið gegn norskum liðum í Evrópukeppninni. Alls hafa sautján íslensk lið leikið 563 leiki í Evrópukeppni síðan Fram lék fyrst gegn Skovbakken í Danmörku 1962. Haukar hafa leikið flesta leiki, eða 118 og síðan koma Valsmenn með 115 leiki. FH rýfur síðan 100 leikja múrinn í Serbíu.
![](https://handbolti.is/wp-content/uploads/2022/11/3-FRAM-Skovbakken-Plaggat-5100x7020-5100x7020-1-744x1024.jpg)