Jafntefli í fyrsta leik hjá lærisveinum Hannesar Jóns

Alpla Hard gerði jafntefli við nýliða UHC Hollabrunn, 29:29, í fyrstu umferð austurrísku 1. deildarinnar í handknattleik. Leikið var í Hollabrunn í vínræktarhéraðinu Weinviertel. Hollabrunn var marki yfir, 14:13, þegar fyrri hálfleikur var að baki.

Tumi Steinn Rúnarsson skoraði tvö mörk og gaf fjórar stoðsendingar í liði Alpla Hard sem Hannes Jón Jónsson þjálfar. Nýliðinn Tryggvi Garðar Jónsson skoraði eitt mark. Tryggvi Garðar var fastur fyrir í vörninni svo að honum var tvisvar vikið af leikvelli. Hann stal boltanum einu sinni í vörninni.