Jólakveðja

Yfir bústað ykkar breiði ár 
og friður vængi sína!
Jólin þangað ljúfust leiði
ljós, er foldarbörnum skína!
Ekki gull né auðlegð neina
eg úr fjarlægð þangað sendi,
en þá bæn, að ástin hreina
ykkur leiði móðurhendi.

Sæl og glöð ég sé í anda
sólskinið hjá vinum mínum:
Ljósin björt á borði standa,
börnin leika að gullum sínum.
Úti gylltar stjörnur stafa
strauma, sund og hvítar hæðir,
milli hreinna mjallartrafa
máni jólablysið glæðir.

Hulda