- Auglýsing -
Franski handknattleiksmaðurinn Nikola Karabatic reyndist jákvæður í covid skimun eftir leikinn við Hollendinga, innan við tveimur sólarhringum fyrir leikinn við Íslendinga í gærkvöld.
Handknattleikssamband Evrópu, EHF, greinir frá þessu í tilkynningu í dag. Þar segir m.a. að Karabatic hafi greinst með covid í desember. Eins og aðrir sem smitist geti þeir um nokkurt skeið sýnt jákvæða svörun við skimun. Hinsvegar sé svokallað CT-gildi svo hátt í mælingum að ekki sé talið að hann geti smitað.
Af þeim sökum fékk Karabatic heimild til þess að taka þátt í leiknum við Íslendinga í gær, segir í tilkynningu EHF sem danskir fjölmiðlar vitna til.
Samkvæmt reglum mótsins sem handbolti.is hefur undir höndum þarf svokallað CT-gildi sýnis að vera yfir 30 til þess að leikmaður sem greinist jákvæður megi taka þátt í leik á EM.
Eftir viðureignina við Frakka í gærkvöld bárust þau tíðindi úr herbúðum íslenska landsliðsins að Daníel Þór Ingason hafi greinst jákvæður við skimun í hraðprófi í morgun. Beðið er niðurstöðu úr PCR prófi sem tekið var samhliða hraðprófinu í morgun. PCR skimun sem Daníel Þór gekkst undir í gærkvöld reyndist neikvæð.
- Auglýsing -
