Króatar eru ekki síður vonsviknir en Svíar yfir stórsigri íslenska landsliðsins, 35:27, á sænska landsliðinu á Evrópumótinu í handknattleik karla í gær. Stórtap Svía, kom illa við króatíska landsliðið og veldur því að það, þrátt fyrir að vera með fjögur stig, er með langverstu markatöluna í innbyrðis viðureignum Íslands, Svíþjóðar, Slóveníu og Króatíu.
„Þetta var erfiður sunnudagur fyrir handboltaliðið okkar. Ísland gerði það sem við óttuðumst, en það er öllum ljóst að Svíþjóð er mun sterkara lið en raun varð á. Íslendingar léku á als oddi og áttu skilið lófaklapp, en við áttum svo sannarlega ekki skilið það sem gestgjafarnir buðu okkur upp á,“ skrifar Drazen Pinevic, blaðamaður hjá Sportske.
Pinevic veltir fyrir sér hvort keppnisfyrirkomulagið sé sanngjarnt og eitt stórt tap geti verið svo afdrifaríkt fyrir eitt lið, eins og Króata í þessu tilfelli.
Virðist gleyminn
Ljóst er að Pinevic hefur gleymt því að Króatar töpuðu með átta marka mun fyrir Svíum á dögunum. Betri úrslit hefðu væntanlega þýtt betri stöðu Króata. Einnig virðist Pinevic heldur ekki hafa í huga að Ísland féll út á HM fyrir ári eftir að hafa hlotið jafn mörg stig og Króatar og Egyptar í milliriðli þrátt fyrir sigur á Egyptum en því miður helst vegna of stórs taps fyrir Króatíu. Íþróttir eru ekki alltaf sanngjarnar.
