Eftir þrotlausa vinnu á vegum Handknattleikssambands Íslands og Símans undanfarinn rúman sólarhring hefur tekist að fá fólk í Aþenu til samstarfs um upptöku og útsendingu á báðum vináttulandsleikjum Grikklands og Íslands í handknattleik karla.
Þetta staðfesti Kjartan Vídó Ólafsson markaðsstjóri HSÍ í samtali við handbolta.is. Allir hnútar hafa verið rækilega hnýttir og verða báðir leikir sendir í gegnum handboltapassann í sjónvarpi Símans.
Fyrri viðureignin hefst klukkan 14 á morgun, föstudag, og sú síðari á laugardaginn kl. 17.15.
„Við erum í sjöunda himni með að málið er í höfn með aðstoð margra auk þess sem Síminn lagðist hressilega á árarnar með okkur,“ sagði Kjartan Vídó við handbolta.is.
„Eftir mikla vinnu við að finna réttan aðila sem gæti séð um streymi frá Aþenu í samstarfi við Símann þá náðist lending rétt í kvöld. Leikirnir verða báðir í beinni útsendingu fyrir áskrifendur Handboltapassans,“ sagði Kjartan ennfremur og bætti við að HSÍ vildi að allir leikir landsliða Íslands væri sendir út beint í sjónvarpi. Sú verður raunin með útsendingunni á vegum handboltapassans.
Í gærmorgun staðfesti gríska handknattleikssambandið að leikirnir yrðu ekki teknir upp og sendir út. Sambandið hefði engin tök á því. Þar með gekk maður undir mann hér heima að vinna í málunum, að sögn Kjartans sem auðheyrilega var í sjöunda himni þegar handbolti.is náði af honum tali.
Grikkir óska eftir að vera með
Eftir að allir hnútar höfðu verið hnýttir í kvöld óskaði gríska handknattleikssambandið eftir samstarfi og fá útsendingamerkið til sín svo hægt yrði að koma leikjunum fyrir augu grískra handknattleiksleiksáhugamanna og kvenna. Grikkir munu þar með getað notið útsendinga frá leikjunum fyrir tilstuðlan HSÍ.
Allar upplýsingar og skráningu áskriftt að Handboltapassanum.
