- Auglýsing -
- Aldís Ásta Heimisdóttir skoraði fimm mörk þegar lið hennar Skara HF vann stórsigur á Ystads IF HF, 37:25, í annarri umferð sænsku úrvalsdeildarinnar í handknattleik í dag. Leikurinn fór fram í Ystad. Þetta var fyrsti sigur Skara HF í deildinni og hefur liðið þar af leiðandi tvö stig eftir tvo leiki eins og fimm önnur lið.
- Viktor Gísli Hallgrímsson og félagar í Wisła Płock unnu KPR Ostrovia Ostrów, 30:23, á heimavelli í fjórðu umferð pólsku úrvalsdeildarinnar í handknattleik í dag. Viktor Gísli var í marki Wisła Płock hluta leiksins en því miður hefur gengið brösulega að finna nákvæmar upplýsingar um frammistöðu landsliðsmarkvarðarins. Wisła Płock hefur unnið fjórar fyrstu viðureignir sínar í deildinni.
- Arnar Birkir Hálfdánsson skoraði sjö mörk og var markahæstur ásamt Mathias Mark Pedersen hjá Amo HK þegar liðið vann Skånela IF, 37:23, í sænsku úrvalsdeildinni í handknattleik í dag. Amo HK hefur þrjú stig eftir tvo fyrstu leikina í deildinni.
- Volda settist í efsta sæti næst efstu deildar norska handknattleiksins í kvennaflokki í dag með sigri á Levanger, 30:25, í þriðju umferð deildarinnar. Leikið var í Trønderhallen. Dana Björk Guðmundsdóttir skoraði fjögur mörk fyrir Volda.
- Fredrikstad Bkl., liðið sem Elías Már Halldórsson þjálfar, tapaði fimmta leiknum í röð í norsku úrvalsdeildinni í kvennaflokki í dag. Fredrikstad Bkl. tapaði þá fyrir Molde, 42:27, á útivelli. Fredrikstad Bkl. rekur lestina í deildinni.
- Auglýsing -
