- Auglýsing -
- Jóhannes Berg Andrason skoraði fimm mörk í sex skotum, átti þrjár stoðsendingar og var tvisvar vikið af leikvelli þegar TTH Holstebro tapaði með fimm marka mun, 35:30, gegn meisturum Aalborg Håndbold í dönsku úrvalsdeildinni í kvöld.
- Jóhannes Berg átti sannarlega afar góðan leik gegn meisturunum. Arnór Atlason er þjálfari TTH Holstebro.
- Aalborg Håndbold er efst í dönsku úrvalsdeildinni með 10 stig að loknum fimm leikjum. TTH Holstebro situr í áttunda sæti með fjögur stig eftir fimm leiki.
- Dana Björg Guðmundsdóttir landsliðskona í handknattleik skoraði níu mörk og var markahæst þegar lið hennar, Volda, vann Stavanger, 38:31, á útivelli í næst efstu deild norska handknattleiksins í gær. Volda er efst í deildinni eftir þrjá leiki með sex stig.
- Ýmir Örn Gíslason fékk beint rautt spjald eftir 22 mínútna viðureign Göppingen og Flensburg í þýsku 1. deildinni í handknattleik í gær. Hann hafði þá skoraði 1 mark en lið hans var þremur mörkum undir, 11:8. Flensburg vann viðureignina með sex marka mun, 32:26. Göppingen er í 12. sæti með fimm stig eftir sex leiki. Flensburg skaust upp í þriðja sæti með sigrinum. Liðið er með 10 stig eins og Gummersbach.
- Tjörvi Týr, bróðir Ýmis Arnar, skoraði eitt mark og var tvisvar vikið af leikvelli í jafntefli HC Oppenweiler/Backnang við HSG Krefeld Niederrhein, 31:31, á heimavelli í 2. deild þýska handknattleiksins. Oppenweiler/Backnang er neðst í deildinni með tvö stig eins og Dormagen og Lübeck-Schwartau.
- Sveinn Jóhannsson lék með Chambéry Savoie í rúmar 17 mínútur þegar liðið tapaði á heimavelli fyrir Toulouse, 33:31, í 4. umferð frönsku 1. deildarinnar í handknattleik. Sveinn skoraði eitt mark og var einu sinni vikið af leikvelli.
- Chambéry er í 10. sæti af 16 liðum deildarinnar með þrjú stig eftir fjóra leiki.
- Ryger Stavanger, sem Elías Már Halldórsson þjálfar, vann sinn fyrsta leik á keppnistímabilinu í næst efstu deild norska handknattleiksins í karlaflokki í dag. Ryger Stavanger lagði Charlottenlund, 30:26, og situr í 8. sæti deildarinnar af 14.
- Auglýsing -
