Landsliðskonan Dana Björg Guðmundsdóttir er í úrvalsliði næst efstu deildar norska handknattleiksins sem tekið var saman upp úr tölfræðiþáttum leikmanna deildarinnar. Dana Björg hafði töluvert forskot á aðra leikmenn deildarinnar þegar kom að vinstri hornastöðunni.
Dana Björk sem var að ljúka sína þriðja tímabili með Volda skoraði 153 mörk í deildinni í vetur. Hún skoraði 70,2% skota sinna.
Volda var nærri því að færast upp í úrvalsdeildina. Liðið tapaði fyrir Haslum í oddaleik í umspili úrvalsdeildar eftir að hafa hafnað í öðru sæti næst efstu deildar, jafnt Fjellhammer að stigum. Fjellhammer fór rakleitt upp í úrvalsdeildina.
Dana Björg er 23 ára gömul og hefur leikið níu landsleiki og skoraði 20 mörk. Hún lék sínn fyrsta landsleik í október á síðasta ári gegn Pólverjum og hefur síðan ekki misst úr leik.
