Meiðsli herja á herbúðir nýliða HK í Olísdeild karla. Ekki færri en fimm leikmenn eru frá keppni þessa dagana. Nokkrir þeirra mæta ekki til leiks fyrr en á nýju ári eftir því sem næst verður komist. HK er í harðri baráttu um tilverurétt sinn í deildinni og er í sömu sporum og flest önnur lið að mega lítt við nokkrir leikmenn hrökkvi úr skapti um lengri eða skemmri tíma.
Júlíus Flosason, sem hóf leiktíðina af miklum krafti, meiddist í leik við KA í 3. umferð. Hann er ekki væntanlegur til leiks á ný fyrr en í febrúar þegar blásið verður til leiks í Olísdeildinni eftir EM-hléið.
Hornamaðurinn Ari Sverrir Magnússon var hvorki með í leiknum við Fram í gær né gegn Selfoss um síðustu helgi. Meiðsli hrjá hann og óvíst er hvenær búast má við honum fram á leikvöllinn á nýjan leik.
Fyrirliðinn öflugi, Pálmi Fannar Sigurðsson verður einnig frá keppni um ótiltekinn tíma. Hann meiddist í leiknum við Selfoss á laugardaginn. Pálmi Fannar er burðarás í varnarleik HK.
Leikurinn við Selfoss reyndist HK-ingum dýr. Ekki aðeins meiddist Pálmi Fannar heldur einnig skyttan Kristófer Ísak Bárðarson. Kristófer Ísak hefur vakið verðskuldaða athygli í fyrstu leikjum tímabilsins. Hann verður frá um tíma.
Fimmti leikmaðurinn á sjúkralista HK-liðsins er Styrmir Máni Arnarson. Hann hefur enn ekki spilað leik í Olísdeildinni eftir erfið meiðsli á undirbúningstímabilinu.
Bikarleikur á sunnudaginn
HK mætir Hvíta riddaranum í 16-liða úrslitum Poweradebikarkeppninnar að Varmá á sunnudagnn. Næsta viðureign Kópavogsliðsins verður við hina nýliða Olísdeildarinnar, Víking, í Kórnum föstudaginn 10. nóvember.
Staðan og næstu leikir í Olísdeildunum.
