Lárus Gunnarsson verður aðstoðarþjálfari karlaliðs Gróttu á komandi leiktíð. Einnig hyggst hann standa í marki liðsins samkvæmt tilkynningu frá félaginu í dag. Lárus var þjálfari yngri flokka Vals á síðasta vetri. Hann kom á ný til liðs við Gróttu undir lok síðustu leiktíðar og freistaði þess að leggja lóð sitt á vogarskálarnar þegar Grótta tók þátt í umspili Olísdeildar karla. Allt kom fyrir ekki og Grótta leikur í Grill 66-deildinni á næstu leiktíð eftir nokkurra ára veru í Olísdeildinni.
Í tilkynningu frá Gróttu segir að Lárus þekki félagið vel eftir að hafa leikið upp alla yngri flokka þess og um 140 leiki með meistaraflokki þar að auki. Hann er sagður koma inn með góða reynslu, bæði innan vallar og utan.
Auk þess að leika með Gróttu var Lárus um skeið markvörður Stjörnunnar. Hann var þjálfari Kríu um skeið en eftir að liðið vann sér þátttökurétt í Olísdeildinni vorið 2021 lagði það upp laupana. Lárus fór nokkru síðar til C-deildarliðsins Bergsøy í Noregi þjálfaði í eitt ár.
