Fjórðu umferð Olísdeildar karla lýkur í dag með tveimur hörkuleikjum í tveimur landshlutum. Til viðbótar þá verður tendrað upp í 3. umferð Grill 66-deildar karla þar sem keppni er ekki síður skemmtileg og spennandi en í Olísdeild karla.
Fjörið í Olísdeildinni hefst klukkan 15 þegar Þór Akureyri tekur á móti bikarmeisturum ÍBV í Íþróttahöllinni á Akureyri. Rúmeninn Viorel Bosca, sem nýverið gekk til liðs við Þór leikur sinn fyrsta leik hér á landi. Þá er ekki ósennilegt að Eyjamenn tefli fram Sveini Jose Rivera sem skipti yfir í raðir ÍBV-liðsins í vikunni. Leikurinn á Akureyri verður sýndur í streymi á Þór TV sem nálgast má í gegnum youtube.
Tveimur stundum eftir að flautað verður til leiks á Akureyri og menn væntanlega byrjaðir að skola af sér svitann munu leikmenn Fram og ÍR eigast við í Framhúsinu í lokaleik umferðarinnar. Bæði lið hafa átt erfitt uppdráttar fram til þessa og eru í neðri hlutanum, Fram með eitt stig en Breiðhyltingar án stiga. Leikurinn verður í beinni útsendingu Stöðvar2sports.
Þótt skammt sé liðið af Grill 66-deild karla er engu að síður hægt að segja að um toppslag verði að ræða í Kórnum klukkan 16 þegar HK mætir Víkingi. Síðarnefnda liðið hefur farið afar vel af stað og lagt ungmennalið Hauka og Vals. HK tapaði naumlega fyrir Fjölni um síðustu helgi, með eins marks mun, 26:25, eftir að hafa unnið ungmennalið Selfoss, 27:25, í fyrstu umferð. Ef ég þekki HK-menn rétt þá verður leiknum væntanlega streymt á HKTV í á youtube.
Áður en leikir dagsins í Olísdeild karla hefjst er ekki út vegi að rifja upp hvað Rúnar Sigtryggsson, spámaður 4. umferðar, hafði um leikina að segja í spádómum sínum.
