„Sérstaklega þótti mér sóknarleikurinn bregðast hjá okkur í kvöld. Þær leika hörku vörn og ég vissi alveg hvað við vorum að fara út í. Mér fannst við alls ekki ná að leysa það nógu vel,“ sagði Díana Dögg Magnúsdóttir landsliðskona í handknattleik í samtali við handbolta.is eftir að íslenska landsliðið tapaði, 30:19, fyrir Þýskalandi í síðasta leiknum í F-riðli Evrópumótsins í handknattleik. Við tapið féll íslenska liðið úr leik en þýska liðið heldur áfram keppni í milliriðli og fylgir hollenska liðinu eftir.
Virtist vera eitt plan
„Við létum stoppa okkur of mikið. Mér fannst vanta hjálpina. Þetta var svolítið mikið maður á mann og svo virtist ekki vera neitt annað plan. Einnig hefðum við þurft að fá línumennina okkar í blokkeringu til þess að vinna meiri svæði í þess að fá hlaupin á bak við. Mér fannst það ekki virka í dag,“ sagði Díana Dögg sem var svo sannarlega vonsvikin eins og aðrir leikmenn íslenska liðsins að leikslokum.
„Kannski er einhver ósammála mér en mér fannst við ekki spila alltof vel í kvöld. Vissulega erum við alltaf að leggja inn í reynslubankann. Eins og ég sagði í viðtölum fyrir leikinn þá eru særðu dýrin oft þau hættulegustu. Það sannaðist að þessu sinni,“ sagði Díana Dögg Magnúsdóttir í samtali við handbolta.is.
Lengra myndskeiðsviðtal er við Díönu Dögg í þessari grein.
EM kvenna ”24 – leikjadagskrá, riðlakeppni
A-landslið kvenna – fréttasíða
