Lilja Ágústsdóttir vinstri hornamaður nýkrýndra Evrópubikarmeistara Vals og íslenska landsliðsins leikur ekkert með Val í úrslitaleikjunum við Hauka um Íslandsmeistaratitilinn í handknattleik. Fyrsta viðureign liðanna fer fram í N1-höllinni á Hlíðarenda í kvöld.
Ágúst Jóhannsson faðir Lilju og þjálfari Vals staðfesti við handbolta.is í morgun að Lilja hafi farið í aðgerð á hægra hné í gær og verði þar af leiðandi ekkert með Val í leikjunum framundan gegn Haukum.
Óheppin í vetur
Lilja hefur verið afar óheppin með meiðsli á leiktíðinni. Hún meiddist illa á ökkla í landsleik í Tékklandi í lok september og kom ekki til greina af þeim sökum þegar EM-hópurinn var valinn. Var Lilja mánuðum saman frá keppni af þeim sökum.
Þegar Lilja hafði jafnað sig í ökklanum tóku hnémeiðslin við.
Eftir sigurleikinn á BM Porrino í Evrópubikarkeppninni á laugardaginn, þar sem Lilja fór á kostum, var ljóst að hún gæti ekki haldið áfram keppni.
Átta til tíu vikur
Ágúst faðir Lilju sagðist telja að hún verði frá handbolta næstu 8 til 10 vikur. Gangi allt vel verður Lilja klár í slaginn á nýjan leik þegar undirbúningur fyrir næsta tímabil hefst hjá Val.
Fyrsta viðureign Vals og Hauka um Íslandsmeistaratitilinn í handknattleik kvenna fer fram í N1-höllinni á Hlíðarenda í kvöld og hefst klukkan 19.30.
Olís kvenna: Leikjadagskrá, úrslitakeppni 2025
