„Maður var aldrei rólegur þótt við værum með yfirhöndina allan tímann,“ sagði Haraldur Þorvarðarson aðstoðarþjálfari karlaliðs Fram eftir að liðið tryggði sér sæti í 16-liða úrslitum Poweradebikarsins í handknattleik karla í dag með sex marka sigri á Gróttu, 30:24, í Hertzhöllinni á Seltjarnarnesi.
„Við byrjuðum betur í síðari hálfleik og náðum smá forskoti sem við héldum til leiksloka. Frammistaðan hjá okkur var nokkuð traust. Markvarslan var frábær og auk þess sem ungir leikmenn eins og Marel Baldvinsson stóðu sig vel. Hann var að leika sinn fyrsta meistaraflokksleik og skoraði fjögur mörk í fjórum skotum. Marel er í þriðja flokki. Hann sýndi ákveðinn kjark eins og fleiri leikmenn,“ sagði Haraldur ennfremur í samtali við handbolta.is.
Framundan er tveggja vikna hlé frá kappleikjum í Olísdeildinni og í Poweradebikarnum vegna æfinga og leikja landsliðsins við Færeyinga á næsta föstudag og laugardag. Haraldur sagði hléið vera kærkomið til að gefa leikmönnum tækifæri til þess að jafna sig af smámeiðslum en nokkuð er um það innan raða Framliðsins eins og hjá fleiri liðum.
