Stúlkurnar í 16 ára landsliðinu í handknattleik leika við Svíþjóð á morgun í krossspili um sæti fimm til átta á Opna Evrópumótinu í Gautaborg í Svíþjóð. Sigurliðið leikur um fimmta sæti mótsins við Spán eða Noreg sem eigast við í hinni viðureign krossspilsins. Tapliðin leika um 7. sætið. Leikurinn við Svía hefst klukkan 10 og verður sendur út á ehftv.com.
Íslenska liðið hefur unnið þrjá leiki, gert eitt jafntefli og tapað tveimur viðureignum á mótinu sem hófst á mánudagsmorgun.
Íslenska liðið tapaði báðum leikjum sínum í dag. Fyrri viðureignin var við landslið Sviss og tapaðist hún með fimm marka mun, 27:22, eftir að Sviss var tveimur mörkum yfir í hálfleik, 15:13. Íslensku stúlkunum tókst að minnka muninn í eitt mark, 16:15, snemma í síðari hálfeik áður en Sviss náði afar góðum kafla og var mest sjö mörkum yfir.
Síðdegis tapaðist leikurinn við Þýskaland með fjögurra marka mun, 21:17, en einu marki munaði þegar fyrri hálfleikur var að baki, 11:10, fyrir þýska liðið.
Þýskaland leikur við Ungverjalandi í undanúrslitum en í hinni viðureigninni eigast við Frakkland og Sviss.
Mörk Íslands í leiknum við Sviss: Tinna Ósk Gunnarsdóttir 6, Roksana Jaros 3, Hrafnhildur Markúsdóttir 3, Ebba Guðríður Ægisdóttir 2, Silja Katrín Gunnarsdóttir 2, Vigdís Arna Hjartardóttir 2, Dagný Þorgilsdóttir 1, Laufey Helga Óskarsdóttir 1, Eva Steinsen Jónsdóttir 1, Hafdís Helga Pálsdóttir 1.
Í markinu varði Arna Sif Jónsdóttir 7 skot og Danijela Sara B. Björnsdóttir 2.
Mörk Íslands í leiknum við Þýskaland: Roksana Jaros 3, Laufey Helga Óskarsdóttir 3, Tinna Ósk Gunnarsdóttir, 2, Silja Katrín Gunnarsdóttir 2, Hrafnhildur Markúsdóttir 2, Eva Steinsen Jónsdóttir 2, Ebba Guðríður Ægisdóttir 1, Valgerður Elín Snorradóttir 1, Hafdís Helga Pálsdóttir 1.
Í markinu varð Arna Sif Jónsdóttir 11 skot.
