Athygli vakti að aðalmarkvörður kvennaliðs Hauka undanfarin ár, Margrét Einarsdóttir, var ekki í leikmannahópi liðsins í sigurleiknum á Selfossi í fyrstu umferð Olísdeildar á fimmtudaginn í síðustu viku. Hún verður heldur ekki með Haukum í næstu leikjum. Margrét hefur alls ekki lagt skóna á hilluna að sögn Díönu Guðjónsdóttur þjálfara Hauka.
Að sögn Díönu fékk Margrét frí hjá Haukum í ágúst og september vegna vinnu sem henni bauðst og ekki var hægt að slá hendinni á móti. Að fríinu loknu er von á Margréti til æfinga með Hafnarfjarðarliðinu þar sem hennar bíður hörð keppni um markvarðastöðuna.
Hörð keppni
Haukar kræktu í Söru Sif Helgadóttur, markvörð, frá Val í sumar auk þess sem markvörðurinn Elísa Helga Sigurðardóttir var fyrir í herbúðum Hauka svo ljóst er að framundan er hörð barátta um markvarðarstöðuna á næstu mánuðum þegar Margrét mætir aftur eftir frí.
Næsti leikur Hauka í Olísdeild kvenna verður gegn Fram í Lambhagahöllinni í Úlfarsárdal á laugardaginn klukkan 16.30. Fram vann Stjörnuna örugglega í 1. umferð.
Leikjdagskrá og staðan í Olísdeildum.
