Marklínutækni, þ.e. myndavélar inni í mörkum sem geta skorið úr um hvort boltinn fer yfir marklínuna eða ekki, verður tekin upp í öllu leikjum í efstu deild karla í þýska handboltanum á næstu leiktíð. Fram til þessa hafa verið skiptar skoðanir hvort stíga eigi skrefið til fulls, m.a. vegna kostnaðar sem talinn er vera um hálf milljón evra, um 75 milljónir kr.
Með því að stíga skrefið vilja stjórnendur deildarinnar leggja dómurum lið. Undanfarin ár hafa dómarar getað notað VAR-tæknina í leikjum 1. deildar karla, að marklínutækninni undanskilinni. Aðeins hefur verið notast við marklínumyndavélar á leikjum úrslitahelgar bikarkeppninnar.
Í desember átti sér stað umdeilt atvik í toppslag þýsku deildarinnar í leik SC Magdeburg og Füchse Berlin sem lauk með jafntefli. Varð það til þess að krafa um marklínutæknina vaknaði upp á ný. Berlínarmenn töldu sig hafa skorað gott og gilt mark en dómarar voru á öðru máli. Vegna þess að marklínutæknin var ekki fyrir hendi var ekki hægt að slá föstu hvort markið hafi verið gott og gilt eða ekki. Glöggir menn töldu fullvíst að skorað hafi verið mark. Það hefði tryggt Füchse Berlin sigur.
(gervigreind var nýtt við vinnslu greinarinnar).
