Íslandsmeistarar Vals mæta slóvakíska meistaraliðinu MSK IUVENTA Michalovce í undanúrslitum Evrópubikarkeppni kvenna í handknattleik í N1-höllinni á Hlíðarenda klukkan 17.30 í dag. Leikmenn Vals eru staðráðnir í að snúa við blaðinu eftir tveggja marka tap, 25:23, í fyrri viðeigninni ytra fyrir viku og komast í úrslit Evrópubikarkeppninnar, fyrst íslenskra kvennaliða. Stuðningur áhorfenda getur skipt sköpum.
„Við erum ótrúlega spenntar fyrir þessu,“ segir Elín Rósa í samtali við handbolti.is.
„Við eigum mikla möguleika þrátt fyrir að andstæðingurinn sé sterkur,“ bætir Elín Rósa við en hún telur Valsliðið hafa dregið góðan lærdóm af fyrri leiknum ytra sem muni nýtast í dag.
„Við höfum gott sjálfstraust eftir velgengni síðustu ára og því er enginn vafi á að við eigum góða möguleika í leiknum við Michalovce-liðið,“ segir Elín Rósa sem biðlar til fólks að mæta í N1-höllina í dag og leggjast á árar með Valsliðinu í dag.
„Það er mjög spennandi fyrir fólk að koma á leikinn og styðja við bakið á okkur. Ég skora á handboltafólk að mæta,“ segir Elín Rósa Magnúsdóttir leikmaður Vals og íslenska landsliðsins sem er ákveðin í að skrifa söguna í dag með stöllum sínum í Val.
Lengra viðtal við Elínu Rósu er í myndskeiði hér fyrir ofan.
MSK IUVENTA Michalovce lék til úrslita í Evrópubikarkeppninni síðasta vor en beið lægri hlut.
Síðari viðureign Vals og slóvakísku meistaranna MSK IUVENTA Michalovc fer fram í N1-höllinni á Hlíðarenda í dag. Flautað verður til leiks klukkan 17.30.
Rétt er að hvetja handknattleiksáhugafólk til þess að fjölmenna á Hlíðarenda og styðja Valsliðið til sigurs. Íslenskt kvennalið hefur aldrei leikið til úrslita í Evrópukeppni félagsliða.
Sjá einnig:
Við þurfum fullt hús á Hlíðarenda og alvöru frammistöðu
ÍBV og Valur komust í undanúrslit fyrir tveimur áratugum
Við getum og viljum vinna og komast úrslitaleikina
