SG Handball West Wien varð í gærkvöld Austurríkismeistari í handknattleik karla í sjötta sinn og í fyrsta skipti í 30 ár. Gleði leikmanna, þjálfara og stjórnenda verður hinsvegar skammvinn því lið félagsins heyrir brátt sögunni til. Útlit er fyrir að meistaratitillinn hafi verið sá síðasti í sögu félagsins.
Í mars var tilkynnt að SG Handball West Wien, sem íslenskir handknattleiksmenn og þjálfarar hafa tengst um lengri og skemmri tíma, verði lagt niður sem atvinnumannalið en áfram rekið fyrir æfingar barna og unglinga. Ekki er útlit fyrir að ákvörðuninni verði breytt þrátt fyrir meistaratitilinn í gær sem var í höfn eftir annan sigur liðsins á Linz í úrslitaeinvíginu, 30:26.
Fjöldi Íslendinga
Nokkrir íslenskir handknattleiksmenn og þjálfarar hafa komið við sögu SG Handball West Wien í gegnum tíðina. Erlingur Richardsson þjálfari Íslandsmeistara ÍBV þjálfaði lið West Wien frá 2013 til 2015. Við tók af honum Hannes Jón Jónsson sem var við stjórnvölin í fjögur ár. Hannes Jón lék einnig með liðinu um skeið meðan hann var þjálfari. Á þjálfaraárum Hannesar Jóns hjá félaginu léku Guðmundur Hólmar Helgason, Ólafur Bjarki Ragnarsson og Viggó Kristjánsson með liðinu.
Höfuðborgarliðið SG Handball West Wien hefur lengi verið á hrakhólum með almennilega keppnis- og æfingaaðstöðu. Lítill vilji hefur verið fyrir hendi meðal stjórnenda Vínarborgar að byggja upp almennilega keppnisaðstöðu sem m.a. hefur staðið félaginu fyrir þrifum.
