„Þetta svar hjá liðinu var mikið meira í okkar anda og í takti við æfingar vikunnar,“ sagði Snorri Steinn Guðjónsson landsliðsþjálfari karla í handknattleik þegar handbolti.is sló á þráðinn til hans eftir tveggja marka sigur á Þjóðverjum, 31:29, í síðari vináttuleiknum í München síðdegis.
„Ég var undrandi en ekki áhyggjufullur eftir fyrri leikinn því hann var ekkert í líkingu við það sem við mátti búast við eftir æfingar dagana á undan. Það var gott að fá þennan sigur,“ sagði Snorri Steinn af yfirvegun.
Unnum okkur út úr vandanum
„Frammistaðan var mjög heilsteypt hjá okkur gegn góðum Þjóðverjum. Á milli komu kaflar þar sem við vorum í vandræðum en við náðum alltaf að vinna okkur úr vandanum, komast aftur inn á sporið, leysa vandann.“
Auðveldar framhaldið
Snorri Steinn sagði ennfremur að sigurinn auðveldaði framhaldið, þ.e. að byggja ofan á þá vinnu sem menn hafa lagt að baki síðustu vikuna. „Leikurinn í dag staðfestir að vinnuvikan var fín og það sé margt sem við getum tekið með okkur inn næsta undirbúningstíma,“ sagði Snorri Steinn en landsliðið kemur næst saman um áramótið, um hálfum mánuði áður en Evrópumótið hefst í Svíþjóð, Danmörku og Noregi.
Lærum einnig af fyrri leiknum
„Við getum líka dregið mikinn lærdóm af fyrri leiknum. Hann sýnir best hvernig farið getur ef við erum ekki 110% prósent með á nótunum frá upphafi,“ sagði Snorri Steinn Guðjónsson sem segist hafa fengið mörg svör á síðustu dögum til þess að taka með sér inn í vangavelturnar sem eru framundan að velja keppnishóp fyrir Evrópumótið.
