- Auglýsing -
- Aldís Ásta Heimisdóttir mætti til leiks á ný með sænska úrvalsdeildarliðinu Skara HF í gær eftir að hafa misst af bikarleik um síðustu helgi vegna meiðsla. Hún skoraði þrjú mörk, þar af eitt úr vítkasti, þegar Skara vann VästeråsIrstad HF, 22:19, á heimavelli í fyrstu umferð sænsku úrvalsdeildarinnar. Jóhanna Margrét Sigurðardóttir skoraði eitt af mörkum Skara-liðsins. Katrín Tinna Jensdóttir leikur einnig með Skara. Hún tekur fyrst og fremst þátt í varnarleiknum.
- Íslendingatríóið hjá Skara mætir Kristianstad HK á útivelli í annarri umferð deildarinnar á laugardaginn eftir viku. Með Kristianstad HK leikur Berta Rut Harðardóttir. Kristianstad HK á leik í kvöld við Lugi í Lundi.
- Í gær voru vistaskipti Hákons Daða Styrmissonar frá Gummersbach til Eintrach Hagen staðfest. Hann verður gjaldgengur með Hagen í kvöld þegar liðið sækir Dessau-Roßlauer HV 06 heim í þýsku 2. deildinni. Hákon Daði kom til liðs við Gummersbach sumarið 2021 og lék afar vel og skoraði mikið allt þar til hann sleit krossband undir lok ársins og var eitt ár frá keppni. Eftir það átti Hákon Daði lengst af erfitt uppdráttar hjá Gummersbach.
- Hjörvar Gunnarsson tók um mánaðarmótin við starfi framkvæmdastjóra handknattleiksdeildar ÍBV. Hann er borinn og barnfæddur Eyjamaður og er nýlega fluttur heim aftur eftir því fram kemur í viðtali við Hjörvar á vefnum Tígull.is. Hjörvar er með BS í viðskiptafræði og mikill áhugamaður um handknattleik.
- Reikna má með að a.m.k. tveir mánuðir líði í viðbót þangað til þýski landsliðsmaðurinn Steffen Weinhold leikur á ný með THW Kiel. Weinhold er að jafna sig af meiðslum í vinstri öxl sem hann varð fyrir í sumar.
- Þýski handknattleiksmaðurinn Christian Dissinger gengur ekki til liðs við danska úrvalsdeildarliðið KIF Kolding. Eftir æfingar með liðinu ákváðu forráðamenn Kolding að ekki yrði samið við Dissinger sem er 31 árs gamall og var m.a. í sigurliði Þýskalands á EM 2016. „Hann er ekki sá leikmaður sem við erum að leita að um þessar mundir,“ sagði Lars Christensen íþróttastjóri Kolding í samtali við danska fjölmiðla.
- Auglýsing -
