- Auglýsing -
- Aldís Ásta Heimisdóttir og samherjar hennar í sænska úrvalsdeildarliðinu Skara HF fá nýjan þjálfara á allra næstu dögum. Daninn Pether Krautmeyer sem tók við þjálfun í sumar hefur sagt upp störfum af persónulegum ástæðum. Aðeins eru þrjár umferðir að baki í sænsku úrvalsdeildinni. Af þeim hefur Skara HF unnið einn leik.
- HF Karlskrona er í öðru sæti sænsku úrvalsdeildarinnar í karlaflokki með níu stig að loknum sex leikjum eftir sigur á Skånela, 27:21, á heimavelli í gær. Ólafur Andrés Guðmundsson skoraði tvö mörk en Dagur Sverrir Kristjánsson ekkert. Þorgils Jón Svölu Baldursson var ekki í leikmannahópi Karlskrona að þessu sinni. Phil Döhler fyrrverandi markvörður FH skoraði eitt mark
- Til viðbótar við markið góða átti Döhler stórleik í marki Karlskrona. Hann varði 18 skot, 46%, og átti stóran hlut í sigrinum.
- Ekki gengur sem skildi hjá Einari Braga Aðalsteinssyni og samherjum hans í sænska úrvalsdeildarliðinu IFK Kristianstad. Þeir töpuðu í gær fyrir IF Hallby HK, 29:23, á útivelli. Einar Bragi skoraði tvisvar í leiknum. Kristianstad í fjórða sæti með sjö stig eftir sjö leiki en viðbúið er að liðið geti fallið neðar í töflunni þegar liðin í kring hafa leikið jafn oft. Flest þeirra hafa leikið fimm og sex leiki hvert.
- Stöðuna í sænsku úrvalsdeildinni og í fleiri deildum evrópsks handknattleiks er að finna hér.
- Guðmundur Bragi Ástþórsson skoraði tvö mörk og átti tvær stoðsendingar þegar lið hans, Bjerringbro/Silkeborg vann Sønderjyske, 29:25, á útivelli í dönsku úrvalsdeildinni. Bjerringbro/Silkeborg fór upp í annað sæti deildarinnar með þessum sigri. Liðið hefur 10 stig að loknum sjö leikjum og er fjórum stigum á eftir GOG en stigi fyrir ofan Mors-Thy. Aalborg og Fredericia hafa átta stig og eiga leiki inni gegn þeim sem eru fyrir ofan.
- Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Grétar Ari Guðjónsson varði þrjú skot á þeim 22 mínútum sem hann var í marki US Ivry í heimsókn til Tremblay í gærkvöld í efstu deild franska handknattleiksins. Tremblay vann, 37:33. Darri Aronsson er því miður ekki byrjaður að leika með Ivry eftir langvarandi og erfið meiðsli.
- US Ivry rekur lestina í frönsku 1. deildinni án stiga að loknum sex leikjum. Stöðuna í frönsku 1. deildinni og í fleiri deildum evrópsks handknattleiks er að finna hér.
- Auglýsing -
