- Auglýsing -
- Þýska handknattleiksliðið HC Erlangen, sem Andri Már Rúnarsson og Viggó Kristjánsson leika með, vann austurríska liðið Bregenz, 35:26, í gær í Austurríki. Harðsótt hefur reynst að afla upplýsinga um hvort Andri Már og Viggó skoruðu í leiknum. Ljóst er þó af frásögn af viðureigninni að Andri Már tók a.m.k. þátt.
- HC Erlangen hefur unnið sex af sjö æfingaleikjum á síðustu vikum. Fyrsti leikur liðsins í þýsku 1. deildinni verður gegn THW Kiel á fimmtudaginn í næstu viku.
- Óðinn Þór Ríkharðsson skoraði tvö mörk fyrir svissnesku meistarana Kadetten Schaffhausen í jafntefli við þýska liðið Balingen-Weilstetten, 29:29.
- Í kvöld hefst hið árlega Falkencup-mót í Schaffhausen. Óðinn Þór og samherjar taka á móti þýska liðinu Göppingen á heimavelli. Með Göppingen leikur Ýmir Örn Gíslason. Einnig taka tvö ungmennalið þátt í mótinu i Schaffhausen.
- Norska handknattleikskonan Guro Nestaker samdi í gær við Borussia Dortmund. Nestaker hafði verið liðsmaður HB Ludwigsburg í eitt ár þegar félagið sagði upp samningum við leikmenn í byrjun mánaðarins vegna bágrar fjárhagsstöðu. Nestaker var í sigurliði Storhamar í Evrópudeildinni vorið 2024 en ákvað eftir það að reyna fyrir sér í Þýskalandi.
- Þýska hægri hornakonan Viola Leuchter hefur samið við dönsku meistarana Odense Håndbold. Hún er enn einn leikmaður HB Ludwigsburg frá síðustu leiktíð sem kveður eftir að félagið sagði upp samningi sínum við alla leikmenn í upphafi mánaðarins. Þrátt fyrir að vera aðeins 21 árs þá hefur Leuchter tekið þátt í þremur síðustu stórmótum með þýska landsliðinu.
- Auglýsing -
