Jónas Elíasson og Anton Gylfi Pálsson, dómarar. Mynd/Egill Bjarni Friðjónsson
- Auglýsing -
Anton Gylfi Pálsson og Jónas Elíasson dæma viðureign Wisla Plock og Sporting Lissabon í 14. og síðustu umferð A-riðils Meistaradeildar Evrópu í handknattleik sem fram fer í Plock í Póllandi í kvöld. Bæði lið eru örugg áfram upp úr riðlinum en Sporting eygir annað sætið riðilsins og sæti í átta liða úrslitum. Liðið kæmist þá hjá fyrstu umferð útsláttarkeppninnar.
Vonir standa til þess að Viktor Gísli Hallgrímsson verði jafnvel með Wisla Plock í leiknum. Orri Freyr Þorkelsson verður örugglega með Sporting. Leikurinn hefst klukkan 19.45 í kvöld.
Ísak Steinsson landsliðsmarkvörður náði sér ekki á strik og varði aðeins eitt skot þann tíma sem hann stóð á milli stanganna í marki Drammen í gær í sigurleik liðsins á Bergen í Björgvin, 35:32. Drammen er í 5. sæti deildarinnar með 27 stig eftir 22 leiki, er tveimur stigum á eftir Bergen liðinu. Elverum og Kolstad eru sem fyrr efst með 41 og 40 stig.
Arnar Birkir Hálfdánsson skoraði fimm mörk þegar Amo HK steinlá á heimavelli fyrir Hammarby í sænsku úrvalsdeildinni í handknattleik í gærkvöld, 37:25. Amo HK situr fast í 12. sæti af 14 liðum deildarinnar með 16 stig þegar tvær umferðir eru eftir.
Tryggvi Þórisson og félagar í IK Såvehof komust í hann krappann gegn neðsta liðinu Skånela á heimavelli í sænsku úrvalsdeildinni í gær. Þeim tókst að kreista út sigur, 33:32, eftir að hafa verið undir lengi vel, m.a. 18:15, eftir fyrri hálfleik. Tryggvi kom aðallega við sögu í vörninni. Sävehof færðist upp í fjórða sæti með 28 stig eftir 24 leiki. HF Karlskrona hefur einnig 28 stig en á leik til góða.
