- Auglýsing -
- Arnar Birkir Hálfdánsson var hetja Amo HK í gærkvöld þegar hann skoraði tvö síðustu mörk liðsins er það krækti í jafntefli, 32:32, á heimavelli í viðureign við IF Hallby HK. Arnar Birkir skoraði jöfnunarmarkið þegar fimm sekúndur voru til leiksloka. Hallby-menn misstu boltann þegar 24 sekúndur voru til leiksloka. Arnar Birkir og félagar nýttu vel leiktímann sem eftir var. Stigið nægði Amo HK til þess að færast upp um eitt sæti, upp í það tíunda með 12 stig eftir 15 leiki.
- Arnar Birkir skoraði fjögur mörk í sex skotum og átti til viðbótar fjórar stoðsendingar.
- Birgir Steinn Jónsson skoraði tvö mörk, annað úr vítakasti, þegar IK Sävehof steinlá á heimavelli fyrir Alingsås, 20:29, í sænsku úrvalsdeildinni í gær. Birgir Steinn átti einnig þrjár stoðsendingar. IK Sävehof heldur engu að síður fimmta sæti deildarinnar með sín 17 stig eftir 15 leiki. Alingsås er í áttunda sæti.
- Hákon Daði Styrmisson skoraði níu mörk úr 10 skotum fyrir Eintracht Hagen á heimavelli í gær. Sex af mörkunum skoraði Hákon Daði úr vítaköstum. Frammistaða Hákons Daða dugði ekki til sigurs því gestirnir í Balingen-Weilstetten unnu með tveggja marka mun, 32:30. Hagen er í fjórða sæti deildarinnar með 21 stig eftir 15 leiki. Balingen er í öðru með 24 stig, tveimur stigum á eftir Bietigheim sem lagði Dessau-Roßlauer HV 06, 33:25, á heimavelli.
- Leikjum Hákons Daða með Hagen fækkar óðum en hann flytur heim til Íslands um áramót og gengur væntanlega til liðs við annaðhvort Val eða ÍBV.
- Úlfar Páll Monsi Þórðarson var ekki á meðal þeirra sem skoruðu fyrir RK Alkaloid í stórsigri á MRK Kumanovo, 42:25, í 16. umferð úrvalsdeildarinnar í Norður Makedóníu í gær. RK Alkaloid situr í þriðja til fjórða sæti ásamt HC Ohrid.
- Stöðuna í mörgum af deildum evrópsks handknattleiks er finna hér.
Vinsælt lesefni:
- Auglýsing -
