- Auglýsing -
- Arnór Atlason fagnaði sigri með liðsmönnum sínum í TTH Holstebro í gær þegar þeir lögðu neðsta lið dönsku úrvalsdeildarinnar Lemvig, 39:28, á heimavelli í átjándu umferð deildarinnar og þeirri síðustu á árinu. Holstebro er í 10. sæti af 14 liðum deildarinnar.
- Haukur Þrastarson skoraði tvö mörk fyrir Industria Kielce þegar liðið vann enn einn stórsigurinn í pólsku úrvalsdeildinni í handknattleik í gær. Að þessu sinni lágu liðsmenn Górnik Zabrze í valnum, 41:23.
- Framundan er stórslagur í pólsku deildinni á miðvikudagskvöld þegar Industria Kielce og Wisla Plock mætast í uppgjöri taplausu liðanna tveggja í Kielce.
- Stöðuna í pólsku úrvalsdeildinni og í fleiri deildum evrópsks handknattleiks er að finna hér.
- Dana Björg Guðmundsson skoraði fjórum sinnum þegar Volda lagði Flint Tønsberg í hörkuspennandi leik í Volda Campus Sparebank1 Arena í næst efstu deild norska handknattleiksins í gær. Volda situr í öðru sæti deildarinnar með 20 stig eftir 13 leiki, er fjórum stigum á eftir Haslum. Flint Tønsberg með 17 stig.
- Katrine Lunde, landsliðsmarkvörður Noregs, lék sinn 350. landsleik í úrslitaleik heimsmeistaramótsins í handknattleik kvenna í Jyske Bank Boxen í Danmörku. Lunde 43 ára gömul og lék sinn fyrsta landsleik árið 2002.
- Örn Vésteinsson Östenberg skoraði eitt mark VfL Lübeck-Schwartau þegar liðið steinlá, 31:19, á útivelli í þýsku 2. deildinni í handknattleik í gær. Stöðuna í þýsku 2. deildinni í handknattleik er að finna hér.
- Eins og ótrúlega og það kann að vera þá skoraði Óðinn Þór Ríkharðsson ekki mark fyrir Kadetten Schaffhausen þegar liðið vann stórsigur CS Chênois Genève Handball, 37:24, í svissnesku A-deildinni í handknattleik í gær. Kadetten hafði talsverða yfirburði í leiknum frá upphafi til enda og var m.a. 11 mörkum yfir að loknum fyrri hálfleik, 20:9. Kadetten er efst með 31 stig, fimm stigum fleiri en Amicitia Zürich sem er í öðru sæti
- Franski handknattleiksmaðurinn Kentin Mahé kveður Telekom Veszprém næsta sumar eftir sex ár hjá félaginu. Veszprém sagði frá brottför hans í gær án þess að minnast á hvert Mahé hyggst halda.
- Auglýsing -
