- Auglýsing -
- Ásgeir Snær Vignisson skoraði eitt mark og var einu sinni vísað af leikvelli þegar lið hans Helsingborg tapaði fyrir HK Aranäs, 30:25, í sænsku úrvalsdeildinni í handknattleik í gær. Helsingborg er næst neðst í deildinni þegar tvær umferðir eru eftir, aðeins stigi fyrir ofan Lugi sem á leik til góða. Eitt lið fellur beint úr deildinni en þrjú næstu fyrir ofan taka þátt í umspili.
- Daníel Freyr Andrésson varði eitt skot af sex sem hann fékk á sig þann tíma sem sem hann stóð í marki Lemvig í gærkvöld þegar liðið tapaði fyrir Skjern, 28:26, á heimavelli í dönsku úrvalsdeildinni í handknattleik í gærkvöld. Lemvig er næst neðst í deildinni með 12 stig eftir 23 leiki, á þrjá leiki eftir.
- Berta Rut Harðardóttir skoraði ekki mark fyrir lið sitt Holstebro þegar það vann Ejstrup-Hærvejen, 25:22, í 20. umferð næst efstu deildar danska handknattleiksins í gærkvöld. Holstebro er í þriðja sæti deildarinnar með 34 stig eins og Bjerringbro sem er í öðru sæti og á leik til góða.
- US Ivry, sem Darri Aronsson er leikmaður hjá, vann í gærkvöld afar mikilvægan sigur á Istres, 41:36, í frönsku 1. deildinni í handknattleik. Með sigrinum fór Ivry upp í 13. sæti deildarinnar með 12 stig en 16 lið eru í deildinni. Tvö falla úr deildinni í vor. Sélestat og Istres eru í tveimur neðstu sætunum og Chartres sem tapaði fyrir Montpellier í gær fór niður í 14. sæti við sigur Ivry sem styrkti stöðu sína í baráttunni um áframhaldandi tilverurétt í deildinni. Tíu umferðir eru ennþá eftir óleiknar. Darri er sem kunnugt er frá vegna meiðsla og leikur ekki með Ivry fyrr en á næsta keppnistímabili.
- Viktor Gísli Hallgrímsson stóð skamman tíma í marki Nantes í fyrrakvöld þegar liðið vann Cesson Rennes, 35:26, á útivelli í frönsku 1. deildinni í handknattleik. Viktor Gísli varði eitt skot en skipti snemma leiks við Manuel Gaspar sem stóð í markinu leikinn á enda. Nantes er í öðru sæti deildarinnar með 34 stig, er tveimur stigum á eftir Montpellier sem vann Chartres í gærkvöld, 27:24.
- Grétar Ari Guðjónsson lék í marki Sélestat á síðustu mínútum leiks liðsins við Dunkerque í frönsku 1. deildinni í fyrrakvöld. Grétar Ari varði fjögur skot, 31%. Sélestat tapaði leiknum naumlega, 29:28, rekur áfram lestina í deildinni með sex stig eftir 20 leiki. Alls verða leiknar 30 umferðir í frönsku 1. deildinni.
- EB frá Eiði, sem Kristinn Guðmundsson þjálfar, tapaði naumlega í heimsókn til Stjörnunnar, 26:25, í KÍ-Höllina í Klaksvík í fyrrakvöld. EB rekur lestina í úrvalsdeild kvenna með fjögur stig, einu stigi á eftir StÍF sem á tvo leiki inni á EB.
- Auglýsing -
