- Auglýsing -
- Bergvin Haraldsson hefur verið ráðinn yfirþjálfari yngri flokka ÍBV í handknattleik. Hann hefur verið þjálfari hjá félaginu síðastliðin 10 ár og hefur þjálfunargráðu HSÍ – B. Bergvin útskrifast í sumar sem íþróttafræðingur með B.Sc gráðu úr Háskólanum í Reykjavík.
- Danska meistaraliðið GOG hafnaði tilboði frá THW Kiel í handknattleiksmanninn Emil Madsen. Forsvarsmenn GOG segjast illa mega við því að missa Madsen næsta árið. Næg blóðtaka er að sjá á bak Simon Pytlick og Lukas Jørgensen auk þjálfarans Nicolej Krickau til Flensburg í sumar. Fyrir ári fóru Mathias Gidsel og Emil Jakobsen frá GOG til Þýskalands.
- Hinn þrautreyndi spænski handknattleiksþjálfari Manuel Cadenas verður hugsanlega að hætta þjálfun Ademar Léon vegna veikinda. Cadenas er 68 ára gamall og hefur þjálfað flest bestu félagslið Spánar auk karlalandsliðsins á rúmlega þriggja áratuga ferli í þjálfun. Cadenas skrifaði undir nýjan samning við Ademar Léon í janúar sem óvíst er að hann geti uppfyllt.
- Evrópumeistarar Vipers Kristiansand í handknattleik kvenna hafa samið við spænsku landsliðskonuna Paula Arcos til tveggja ára frá og með næsta keppnistímabili.
- Klavs Bruun Jørgensen fyrrverandi landsliðsþjálfari Dana í handknattleik kvenna og fyrrverandi landsliðsmaður hefur verið ráðinn þjálfari karlaliðs Team Sydhavsøerne sem leikur í næst efstu deild. Jørgensen var síðast þjálfari hjá karlaliði SønderjyskE en staldraði aðeins við í skamman tíma. Team Sydhavsøerne tók þátt í umspili um sæti í úrvalsdeildinni á dögunum en tapaði fyrir Lemvig.
- Auglýsing -
