- Auglýsing -
- Bjarki Már Elísson skoraði sjö mörk fyrir One Veszprém í sigri liðsins á PLER-Búdapest í 21. umferð ungversku 1. deildarinnar í gær, 41:20. Leikið var í Búdapest. One Veszprém er sem fyrr efst í deildinni. Nú hefur liðið 40 stig eftir 21 leik.
- Óðinn Þór Ríkharðsson var markahæstur hjá Kadetten Schaffhausen með níu mörk, þar af eitt úr vítakasti, þegar liðið vann HSC Suhr Aarau, 33:26, í A-deildinni í Sviss í gær á heimavelli. Kadetten fyrir löngu orðið deildarmeistari. Liðið er 11 stigum fyrir ofan HC Kriens sem situr í öðru sæti.
- Guðmundur Bragi Ástþórsson skoraði þrjú mörk í tveggja marka tapi, 31:29, Bjerringbro/Silkeborg fyrir TMS Ringsted í viðureign liðanna í dönsku úrvalsdeildinni í handknattleik í gær. Leikið var á heimavelli Ringsted á Sjálandi. Guðmundur Bragi skoraði eitt marka sinna úr vítakasti. Einnig gaf hann eina stoðsendingu.
- Bjerringbro/Silkeborg er í fimmta sæti úrvalsdeildar þegar þrjár umferðir eru eftir. TMS Ringsted, sem Ísak Gústafsson leikmaður Vals, gengur til liðs við í sumar er í 10. sæti eftir sókn í síðustu leikjum. Virðist liðið ætla að gera harða atlögu að sæti í úrslitakeppninni en átta efstu liðin taka þátt í henni.
- Haukur Þrastarson og liðsfélagar í Dinamo Búkarest unnu borgarslaginn í rúmensku úrvalsdeildinni í gær. Dinamo lagði CSM Búkarest, 36:28. Dinamo Búkarest er sem fyrr langefst í deildinni með 19 sigurleiki og eitt jafntefli í 20 leikjum. Sex umferðir eru eftir.
- Viktor Gísli Hallgrímsson fékk frí í gær þegar lið hans, Wisla Plock, vann neðsta lið pólsku úrvalsdeildarinnar, Slask Wroclaw, 36:28, á heimavelli. Wisla er í efsta sæti deildarinnar með 24 sigurleiki af 25 mögulegum.
- Auglýsing -
