- Auglýsing -
- Eins og áður hefur komið fram þá er Króatinn Luka Cindric á leiðinni frá Barcelona. Samningar standa yfir milli hans og félagsins um starfslok sem mun vera hluti af sparnaðaráætlunum Barcelona sem þarf að draga nokkuð saman í útgjöldum. Cindric á tvö ár eftir af samningi sínum við Katalóníuliðið. Reiknað er með að Cindric semji við annað félag um leið og starfslokasamningi hefur verið náð hjá Barcelona.
- Tobias Reichmann sem óvænt gekk til liðs við TV Emsdetten í þýsku 3. deildinni fyrir um ári síðan hefur ákveðið að yfirgefa félagið. Emsdetten komst ekki upp í 2. deild í vor og Reichmann ætlar sér ekki að leika í 3. deild annað tímabil. Reichmann lék lengi með þýska landsliðinu og var í fimm ár með Melsungen áður en hann samdi við TV Emsdetten.
- Pólski landsliðsmarkvörðurinn Mateusz Kornecki leikur ekki með pólska meistaraliðinu Barlinek Industria Kielce á komandi leiktíð. Hann er sagður vera á leiðinni til Eisenach, nýliða þýsku 1. deildarinnar.
- Portúgalski handknattleiksmaðurinn Andre Gomes var í gær leystur undan samningi hjá MT Melsungen. Skömmu síðar var greint frá samningi Gomez við Al Safa í Sádi Arabíu. Samningurinn er sagður vera metinn frá 600 til 900 þúsund evrur fyrir árið eða frá 90 til 135 milljónir króna. Þetta mun vera einn verðmætasti samningur sem gerður hefur verið við handknattleiksmann.
- Norsku landsliðsmennirnir Sander Sagosen og Gøran Johannessen, sem gengu til liðs við norska meistaraliðið Kolstad í sumar staðfestu í samtali við VG í Noregi í gær að þeir hafi fengið fyrirspurnir frá félögum undanfarna daga. Kolstad stendur á fjárhagslegum brauðfótum þessa dagana og m.a. kvaddi Janus Daði Smárason félagið í gær og gekk til liðs við Evrópumeistara SC Magdeburg.
- Spænski varnarjaxlinn Miguel Sánchez-Migallón hefur gengið til liðs við Benfica í Portúgal eftir nokkra veru hjá pólska meistaraliðinu Barlinek Industria Kielce.
- Auglýsing -
