- Landslið Króatíu, undir stjórn Dags Sigurðssonar, tapaði með 15 marka, 37:22, mun fyrir danska landsliðinu í þriðja og síðasta leik sínum á alþjóðlegu handknattleiksmóti sem lauk í Arendal í Noregi í gær. Króatar unnu Argentínumenn á mótinu en biðu lægri hlut fyrir Noregi og Danmörku.
- Norska landsliðið vann Argentínu í síðasta leik mótsins, 40:28. Argentína sem tekur þátt í Ólympíuleikunum í sumar eins og hin landsliðin þrjú rak lestina á mótinu. Danir og Norðmenn fengu fimm stig hvor af sex möguleikum. Króatar tvö stig.
- Alexander Blonz skoraði átta mörk fyrir norska landsliði í leiknum gegn Argentínu og var markahæstur. Andres Moyano var atkvæðamestur í argentínska landsliðinu með sjö mörk.
- Sænska karlalandsliðið vann þýska landsliðið, undir stjórn Alfreðs Gíslasonar, 34:28, í vináttulandsleik í Vida Arena í Växjö í Svíþjóð í gær. Nokkrir öflugir leikmenn voru ekki með þýska liðinu í leiknum, m.a. Juri Knorr, Sebastian Heymann, Jannik Kohlbacher og Nils Lichtlein.
- Lukas Sandell var markahæstur í sænska landsliðinu með sjö mörk. Julian Köster, Johannes Golla og Frank Semper skoruðu fimm mörk hvor fyrir þýska landsliðið. Svíar voru átta mörkum yfir að loknum fyrri hálfleik, 19:11.