- Auglýsing -
- Dagur Árni Heimisson leikmaður KA U, Stefan Mickael Sverrisson leikmaður Kórdrengja og Björn Ingi Helgason leikmaður Víðis voru úrskurðaðir í eins leiks bann á fundi aganefndar HSÍ í fyrradag en úrskurðurinn var birtur í gær. Allir voru þeir útilokaðir með skýrslu í leikjum liða sinna í síðustu umferð.
- Jón Bjarni Ólafsson leikmaður FH, Kornel Aleksander Wolak leikmaður Víðis, Bjarki Steinn Þórisson leikmaður ÍR og Theis Kock Søndergard leikmaður Gróttu sem einnig voru útilokaðir með skýrslu á dögunum sleppa þar sem brot þeirra voru af öðrum toga en hjá þremenningunum sem fyrr er getið.
- Díana Guðjónsdóttir starfsmaður Hauka sem hlaut útilokun með skýrslu vegna mjög grófrar óíþróttamannslegrar hegðunar eftir leik Hauka og ÍBV í Olísdeild kvenna slapp einnig við refsingu. Aganefnd leit gaumgæfilega á mál hennar og er það „niðurstaða nefndarinnar að þrátt fyrir starfsmaðurinn hefði mátt viðhafa varfærnislegra orðalag í samskiptum við dómara í umrætt sinn, feli ummælin ekki í sér grófa óíþróttamannslega hegðun.
- Telur nefndin að umrædd ummæli starfsmannsins feli fyrst og fremst í sér gagnrýni hennar á störf dómara sem byggir á persónulegri upplifun starfsmannsins. Innan tjáningarfrelsis starfsmannsins rúmast, að mati nefndarinnar, réttur hennar til að segja, innan skynsamlegra marka, skoðun sína á frammistöðu dómara.“
- Einnig áréttar aganefnd í úrskurði sínum mikilvægi þess að þjálfarar og starfsmenn liða, líkt og leikmenn, sýni í orði og verki þá almennu háttvísi og framkomu sem samboðin er handknattleiksíþróttinni.
- Daníel Freyr Andrésson varði eitt vítakast og um það munaði þegar upp var staðið fyrir lið hans, Lemvig, í eins marks sigri á Mors Thy í upphafsleik 9. umferðar dönsku úrvalsdeildarinnar í handknattleik á heimavelli í gærkvöld, 28:27. Þetta var annar sigur Lemvig í deildinni. Framarinn fyrrverandi, Vilhelm Poulsen, skoraði eitt marki fyrir Lemvig í fimm tilraunum. Lemvig situr í 12. sæti af 14 liðum.
- Óskar Ólafsson og Viktor Petersen Norberg töpuðu með félögum sínum í Drammen í heimsókn til ØIF Arendal, 28:26, í norsku úrvalsdeildinni í handknattleik í gærkvöld. Viktor skoraði fimm mörk en Óskar ekkert. Drammen er í þriðja sæti deildarinnar með átta stig eftir sex leiki, er fjórum stigum á eftir Kolstad sem trónir á toppnum.
- Auglýsing -
