- Auglýsing -
- Keppni er hafin aftur eftir hlé í næst efstu deild norska handknattleiksins í kvennaflokki. Dana Björg Guðmundsdóttir var markahæst hjá Volda í stórsigri liðsins á Kjelsås, 40:24 í Oppsal Arena í Osló í gær. Dana Björg skoraði níu mörk úr tíu tilraunum. Volda er í öðru sæti deildarinnar með 22 stig eftir 14 leiki. Haslum Bærum Damer er efst með 26 stig.
- Aron Hólm Kristjánsson og Lydía Gunnþórsdóttir eru handknattleiksfólk ársins 2023 hjá Þór Akureyri. Þau voru þar með tilnefnd í vali á íþróttafólki félagsins fyrir nýliðið ár en hrepptu ekki hnossið.
- Svavar Ólafur Pétursson og Sigurður Hjörtur Þrastarson dæmdu viðureign ungverska liðsins Motherson Mosonmagyaróvári KC og CSM Targu Jiu í 1. umferð riðlakeppni Evrópudeildarinnar í handknattleik í fyrradag. Ungverska liðið vann leikinn örugglega á heimavelli sínum í bænum Mosonmagyaróvár, 33:27.
- Guðjón L. Sigurðsson var eftirlitsmaður á tveimur leikjum sem fram fóru á Jótlandi í Meistaradeild kvenna í handknattleik um nýliðna helgi. Hann var á vaktinni í gær þegar Ikast Handbold gerði jafntefli á heimavelli við FTC-Rail Cargo Hungaria, 28:28, í 9. umferð B-riðils.
- Daginn áður var Guðjón eftirlitsmaður á viðureign dönsku meistaranna, Team Esbjerg og pólska meistaraliðsins KGHM MKS Zaglebie Lubin sem fram fór í Esbjerg. Danska liðið vann örugglega 32:26.
- Nikola Karabatic tekur þátt í sínu 26. stórmóti á ferlinum þegar franska landsliðið hefur keppni á Evrópumótinu í vikunni. Frakkinn hefur tekið þátt í öllum stórmótum í handknattleik frá og með HM 2003 að HM 2021 undanskildu þegar hann var meiddur. Karabatic hefur sextán sinnum unnið til verðlauna með franska landsliðinu.
- Christoffer Rambo leikur ekki með norska landsliðinu á Evrópumótinu í handknattleik. Hann sleit krossband í vináttuleik Noregs og Danmerkur á síðasta fimmtudag.
- Auglýsing -