- Auglýsing -
- Daníel Þór Ingason og liðsmenn Balingen-Weilstetten unnu Dessau-Rosslauer HV 06, 33:29, á heimavelli í gær í 2. deild þýska handknattleiksins. Daníel Þór skoraði ekki mark í leiknum en átti tvær stoðsendingar og varði eitt skot í vörninni. Balingen-Weilstetten situr í níunda sæti deildarinnar með sex stig að loknum fimm leikjum. Bergischer HC er efst með 10 stig.
- Svíinn Henrik Signell hefur verið ráðinn landsliðsþjálfari Hollands í handknattleik kvenna. Hann tekur við af Per Johansson sem lét af störfum að eigin ósk á dögunum þrátt fyrir að eiga ár eftir af samningi sínum. Signell hætti nýverið sem þjálfari kvennalandsliðs Suður Kóreu eftir hálft annað ár í starfi.
- Singell stýrir hollenska landsliðinu þegar það mætir íslenska landsliðinu á Evrópumótinu í handknattleik í Innsbruck í Austurríki 29. nóvember.
- Hollendingurinn Arjan Haenen lét óvænt af störfum aðstoðarþjálfari þýska 1. deildarliðsins MT Melsungen í gær. Sagt er að hann hætti að eigin ósk af persónulegum ástæðum. Tveir Íslendingar leika með MT Melsungen, landsliðsmennirnir Arnar Freyr Arnarsson og Elvar Örn Jónsson.
- Haenen hefur unnið hjá MT Melsungen í átta ár. Hann var áður hjá Lemgo. Haenen var aðstoðarmaður Guðmundar Þórðar Guðmundssonar þegar Guðmundur þjálfaði Melsungen og tók tímabundið við eftir að Guðmundur lét af störfum og þangað til Spánverjinn Roberto Parrondo tók við.
- Auglýsing -
