- Auglýsing -
- Kristján Örn Kristjánsson, Donni, skoraði fimm mörk fyrir Skanderborg AGF þegar liðið gerði sér lítið fyrir og vann þýsku meistarana SC Magdeburg í þriðju og síðustu umferð æfingamóts í Eisenach í Þýskalandi í gær, 37:33. Áður hafði Skanderborg tapað fyrir Eisenach og Gummersbach.
- Ómar Ingi Magnússon var markahæstur hjá SC Magdeburg í leiknum með sex mörk. Áður hafði Magdeburg unnið Gummersbach naumlega, 36:35, og Eisenach með nokkrum markamun.
- Í samtali á heimasíðu Skanderborg AGF er Nick Rasmussen þjálfari Skanderborg AGF afar ánægður með frammistöðu Donna í leikjunum í Þýskalandi sem hann segir falla vel inn í hópinn og leik liðsins. Donni gekk til liðs við danska úrvalsdeildarliðið í sumar eftir fjögurra ára veru hjá PAUC í Frakklandi.
- Elliði Snær Viðarsson og Teitur Örn Einarsson skoruðu þrjú mörk hvor fyrir Gummersbach í öruggum sigri liðsins, 33:26, á Eisenach í loka umferð handknattleiksmótsins í Eisenach í gær. Guðjón Valur Sigurðsson er þjálfari Gummersbach.
- Daníel Þór Ingason og félagar í Balingen-Weilstetten unnu Stuttgart, 27:24, í síðustu umferð æfingamóts, S-Cup, í gær. Daníel Þór skoraði eitt mark í leiknum fyrir utan að vera traustur í varnarleiknum.
- Ýmir Örn Gíslason og samherjar í Göppingen unnu fyrrgreint S-Cup-æfingamót en þátttökulið voru átta. SC DHfK Leipzig, sem Rúnar Sigtryggsson þjálfar, hafnaði í öðru sæti en með liðinu leika Andri Már Rúnarsson og Viggó Kristjánsson.
- Auglýsing -
