- Auglýsing -
- Elvar Ásgeirsson skoraði eitt mark og var einu sinni vikið af leikvelli í góðum sigri Ribe-Esbjerg, 28:25, á TMS Ringsted á heimavelli í gær í keppni liðanna sem höfnuðu í níunda til 13. sæti dönsku úrvalsdeildarinnar. Elvari brást bogalistin í fjórum skotum. Hann átti jafnframt fjórar stoðsendingar á samherja sem skiluðu mörkum.
- Ágúst Elí Björgvinsson markvörður kom lítið við sögu í marki Ribe-Esbjerg. Hann freistaði þess að verja tvö vítaköst en tókst í hvorugt skiptið að koma í veg fyrir að mark væri skorað. Auk Ribe-Esbjerg og TMS Ringsted taka SønderjyskE, Nordsjælland og Grindsted þátt í umspilinu í neðri hlutanum. Neðsta liðið í lok keppninnar leikur við lið úr næst efstu deild um sæti í úrvalsdeildinni á næstu leiktíð.
- Elmar Erlingsson skoraði fjögur mörk og gaf eina stoðsendingu í þriggja marka tapi Nordhorn-Lingen fyrir VfL Lübeck-Schwartau á heimavelli í gær, 34:31, í 2. deild þýska handknattleiksins. Nordhorn er í sjöunda sæti með 28 stig eftir 27 af 34 leikjum. Sem fyrr er deildin afar jöfn og aðeins munar 13 stigum á liðinu í þriðja sæti og því sem situr í 17. og næst neðsta sæti.
- Tryggvi Þórisson og liðsfélagar í IK Sävehof töpuðu í gær fyrir Ystads IF HF, 40:32, í þriðju viðureign liðanna í undanúrslitum úrslitakeppni sænsku úrvalsdeildarinnar. Leikið var í Ystad. Deildarmeistarar Ystads IF HF hafa þar með unnið tvær viðureignir en Sävehof eina en vinna þarf þrjá leiki til þess að komast í úrslitarimmuna. Vika líður fram að næsta leik liðanna sem fram fer í Partille.
- Hammarby hefur tvo vinninga gegn engum Helsingborgar í hinni viðureign undanúrslita.
- Haukur Þrastarson og félagar í Dinamo Búkarest unnu CSM Vaslui, 35:27, á heimavelli í rúmensku úrvalsdeildinni í handknattleik í gær. Haukur skoraði ekki mark í leiknum. Dinamo er efst í deildinni með 21 sigur í 22 leikjum auk eins jafnteflis.
- Grétar Ari Guðjónsson sat allan leikinn á varamannabekknum þegar lið hans Ivry tapaði naumlega á heimavelli fyrir Limoges í frönsku 1. deildinni í gær, 23:22. Kollegi Grétars Ara í marki Ivry varði ágætlega, var með 38% hlutfallsmarkvörslu. Ivry er sem fyrr neðst í deildinni með níu stig þegar sex umferðir eru eftir. Cesson Rennes er næst neðst með 13 stig.
- Auglýsing -
