- Auglýsing -
- Elvar Örn Jónsson skoraði fjögur mörk og átti tvær stoðsendingar þegar MT Melsungen lagði Lemgo, 26:25, á heimavelli í þýsku 1. deildinni í handknattleik í gær. Arnar Freyr Arnarsson lék einnig með Melsungen eins og vant er. Hann skoraði ekki mark að þessu sinni. Lettinn Dainis Kristopans skoraði sigurmarkið skömmu fyrir leikslok.
- MT Melsungen er í fjórða sæti deildarinnar með 35 stig eftir 26 leiki en alls leikur hvert lið deildarinnar 34 leiki. Kiel er stigi á eftir í sjötta sæti en á þrjá leiki inni á Melsungen. Stöðuna í þýsku 1. deildinni og í fleiri deildum evrópsks handknattleiks er að finna hér.
- Hannes Jón Jónsson þjálfari Alpla Hard stýrði liði sínu til öruggs sigurs á Ferlach, 38:25, í átta liða úrslitum austurrísku bikarkeppninnar í gær. Alpla Hard mætir annað hvort Aon Fivers eða Handball Tirol í undanúrslitum.
- Grétar Ari Guðjónsson stóð í marki Sélestat í hálfa átjándu mínútu og varði tvö skot, 17%, þegar liðið gerði jafntefli við Angers, 32:32, á útivelli í næst efstu deild franska handknattleiksins í gær. Sélestat er í fjórða sæti deildarinnar með 26 stig að loknum 21 leik. Stöðuna í frönsku 2. deildinni og í fleiri deildum evrópsks handknattleiks er að finna hér hér.
- US Ivry vann Dijon, 33:23, í efstu deild franska handknattleiksins í gærkvöld og er þar með í 13. sæti af 16 liðum með 13 stig þegar níu umferðir eru eftir. Dijon og Creteil eru tvö neðst og virðast líkleg til þess að falla úr deildinni í vor ef ekki verður breyting á. Darri Aronsson er ekki byrjaður að leika með Ivry að loknum erfiðum meiðslum.
- Kristján Örn Kristjánsson, Donni, er úr leik meðan hann jafnar sig eftir aðgerð á öxl vegna meiðsla. Donni var þess vegna ekki með PAUC í gær í sex marka tapi fyrir Chambéry, 32:26, í efstu deild franska handknattleiksins. PAUC er í sjötta sæti.
- Franski handknattleiksmaðurinn Kentin Mahé leikur undir stjórn Guðjóns Vals Sigurðssonar hjá Vfl Gummersbach í þýsku 1. deildinni í handknattleik á næstu leiktíð. Nokkurra vikna orðrómur þess efnis var staðfestur í gær þegar Gummersbach sagði frá að Mahé komi til félagsins í sumar eftir sex ára veru hjá Telekom Veszprém. Mahé, sem er 33 ára gamall, lék með Gummersbach frá 2011 til 2013.
- Auglýsing -
