- Auglýsing -
- Handknattleikskonan Erika Ýr Ómarsdóttir, hefur skrifað undir samning við bikar- og deildarmeistara ÍBV. Erika Ýr er uppalin í Eyjum og var m.a. valin ÍBV-arar tímabilsins vorið 2021.
- Íslensk handknattleikslið eru að hefja æfingar af fullum þunga þessa dagana eftir sumarleyfi. M.a. hóf karlalið FH æfingar í gær og kvennaliðið í fyrradag. Mikil eftirvænting ríkir í herbúðum FH, ekki síst vegna komu Arons Pálmarssonar til félagsins í sumar. Aron var vitanlega mættur á fyrstu æfinguna með félögum sínum í Kaplakrika í gær, þá fyrstu sem leikmaður FH frá árinu 2009.
- Ola Lindgren hefur framlengt samning sinn um þjálfun nýliða sænsku úrvalsdeildarinnar, HK Karlskrona til eins árs, út næsta keppnistímabil. Lindgren kom inn í þjálfarateymi liðsins fyrir tveimur árum. Karlskrona er nýjasta Íslendingaliðið í Svíþjóð, ef svo má segja. Ólafur Andrés Guðmundsson og Þorgils Jón Svölu Baldursson gengu til liðs við liðið í sumar auk markvarðarins Phil Döhler sem lék með FH í fjögur ár við afar góðan orðstír.
- Lindgren er einn af þekktari handknattleiksmönnum gullkynslóðar sænska landsliðsins á tíunda áratugnum. Hann hefur m.a. þjálfað sænska landsliðið, IFK Kristianstad og Rhein-Neckar Löwen. Lindgren er einnig þjálfari finnska karlalandsliðsins hvar Framarinn Þorsteinn Gauti Hjálmarsson hefur fest sig í sessi á þessu ári.
- Forsvarsmenn Elverum stefna á að setja áhorfendamet á leik í norsku úrvalsdeildinni í karlaflokki þegar meistarar Kolstad kom í heimsókn 7. október. Elverum tilkynnti í gær að leikurinn fari fram í Håkons Hall í Lillehammer. Håkons Hall var byggð fyrir vetrarólympíuleikanna 1994 og hefur oft hýst handboltaleiki.
- Stefnt er á að selja 10 þúsund miða á fyrrgreindan leik. Kolstad á metið eftir að félagið seldi 9.000 miða á heimaleik sinn við Elverum í vetur sem leið. Elverum hefur nokkrum sinnum leigt Håkons Hall fyrir leiki í Meistaradeildinni og fékk 12.377 áhorfendur á viðureign við PSG árið 2019.
- Meint tilboð sádi arabísks handknattleiksliðs til danska handknattleiksmannsins, Mikkel Hansen, mun ekki eiga sér stoð í veruleikanum. Tilboðið átti að hljóða upp á sex milljónir dollara, um 790 milljónir króna.
- Þótt félags- og landslið Rússlands og Belarus séu í banni frá þátttöku í alþjóðlegri keppni mega leikmenn frá þessum löndum ganga til félagsliða í Evrópu. Pólsku bikarmeistararnir Wisla Plock sömdu á dögunum við 18 ára gamlan línumann, Mikita Baranau, frá Belarus. Baranau þykir mikið efni. Samningur hans er til tveggja ára með möguleika á tveimur árum til viðbótar. Óvíst er hvort piltur verði í liði Wisla í Meistaradeild Evrópu á næstu leiktíð.
- Auglýsing -
