- Auglýsing -
- Sebastian Firnhaber leikmaður HC Erlangen leikur ekki með liðinu á næstunni. Hann meiddist á hné í viðureign við Bergischer HC í liðinni viku. Firnhaber er nýlega mættur til leiks aftur eftir 20 mánaða fjarveru vegna krossbandaslits. Ekki er enn ljóst hversu slæm meiðsli hans eru að þessu sinni. Firnhaber er samherji Andra Más Rúnarssonar og Viggós Kristjánssonar.
- Það á svo sannarlega ekki af þýska liðinu MT Melsungen að ganga. Meiðsli og veikindi hrjá leikmenn umvörpum. Uladzislau Kulesh er sá nýjasti á sjúkralista félagsins. Hann verður frá keppni um óákveðinn tíma vegna meiðsla og bætist í hóp a.m.k. sjö samherja sinna sem geta ekki leikið með liðinu um þessar mundir.
- Bastian Roscheck íþróttastjóri þýska liðsins Leipzig segir að framfarir skipti meira máli sem stendur en stigasöfnun. Leipzig tapaði í gær þriðja leik sínum í þýsku 1. deildinni og rekur lestina án stiga eftir þrjár umferðir.
- Christian Dissinger leikmaður Evrópumeistaraliðs Þýskalands 2016 hefur samið við 2. deildarliðið Eulen Ludwigshafen. Dissinger hefur víða komið við á síðustu árum og m.a. leikið í Rúmeníu, Ungverjalandi og Norður Makedóníu.
- Franski lansliðsmarkvörðurinn Rémi Desbonnet hefur framlengt samning sinn við Montpellier til ársins 2030. Desbonnet er 33 ára gamall.
Vinsælt lesefni:
- Auglýsing -
