- Auglýsing -
- Hannes Jón Jónsson og lærisveinar hans í Alpla Hard unnu fyrsta úrslitaleikinn við Linz um austurríska meistaratitilinn í handknattleik karla í gærkvöld, 32:26. Leikurinn fór fram í Bregenz. Næst leiða liðin saman hesta sína í Linz á föstudagskvöld.
- Færeyski landsliðsmaðurinn ungi, Óli Mittún, verður áfram í röðum sænska meistaraliðsins IK Sävehof, a.m.k. út næsta keppnistímabil. Óli hefur verið sterklega orðaður við Pick Szeged en Michael Apelgren þjálfari Sävehof sest í sumar í stól þjálfara ungverska liðsins. Óli varð sænskur meistari í handknattleik í gærkvöld.
- Sænski handknattleiksþjálfarinn Per Johansson heldur áfram að þjálfa ungverska liðið Györ út næsta keppnistímabil. Johansson tók við þjálfun liðsins í lok vetrar eftir ákveðið var að stokka upp spilin í kjölfar brottreksturs Danans Ulrik Kirkely úr stól þjálfara. Györ er eitt fjögurra liða sem leikur til úrslita í Meistaradeild kvenna í handknattleik í Búdapest um næstu helgi ásamt Esbjerg, Metz og Bietigheim.
- Handknattleiksmaðurinn Steffen Weinhold leikur í kvöld í síðasta sinn með THW Kiel á heimavelli þegar liðið mætir SC DHfK Leipzig í næst síðustu umferð þýsku 1. deildarinnar í handknattleik. Eftir áratug í herbúðum Kiel-liðsins hefur Weinhold ákveðið að láta gott heita og ljúka ferlinum í sumar. Alfreð Gíslason þáverandi þjálfari THW Kiel fékk Weinhold til félagsins sumarið 2014 frá Flensburg. Weinhold, sem er 37 ára, lék um árabil í þýska landsliðinu og var m.a. í sigurliðinu á EM 2016 og bronsliðinu á Ólympíuleikunum sama ár undir stjórn Dags Sigurðssonar.
- Auglýsing -
