- Auglýsing -
- Haukur Þrastarson skoraði tvö mörk þegar Dinamo Búkarest vann HC Buzau, 30:24, á útivelli í fjórðu umferð rúmensku 1. deildarinnar í handknattleik í gær. Dinamo hefur þar með unnið fjórar fyrstu viðureignir sínar í deildinni og situr í efsta sæti 1. deildar með 12 stig eins og Potaissa Turda sem lék við Val og ÍBV í undanúrslitum Evrópubikarkeppninnar vorið 2017 og 2018.
- Orri Freyr Þorkelsson skoraði þrjú mörk þegar Sporting Lissabon vann Benfica, 38:22, í uppgjöri Lissabon-liðanna í portúgölsku 1. deildinni í handknattleik í gær. Stiven Tobar Valencia skoraði eitt mark fyrir Benfica. Sporting er efst í deildinni með 12 stig eftir fjóra leiki eins og Porto sem Þorsteinn Leó Gunnarsson leikur með. Benfica hefur unnið tvo leiki og tapað tveimur fram til þessa.
- Sigurjón Guðmundsson átti afar góðan leik í marki Charlottenlund þegar liðið vann Grenland, 27:25, á heimavelli Grenland, Skienshallen, í gær en liðið eru í næst efstu deild norska handknattleiksins. Sigurjón varði 13 skot, 38%, í marki Charlottenlund sem unnið hefur allar þrjár viðureignir sínar til þessa.
- Birta Rún Grétarsdóttir skoraði þrjú mörk fyrir Fjellhammer í sigri á Åsane, 28:20, á heimavelli í næst efstu deild norska handknattleiksins í gær. Fjellhammer er efst í deildinni ásamt Aker og Volda. Hvert lið hefur sex stig eftir þrjár umferðir.
- Janus Daði Smárason og samherjar í OTP Bank-PICK Szeged unnu fimmta leik sinn í röð í ungversku 1. deildinni í handknattleik. Þeir unnu Balatonfüredi KSE , 37:28, að þessu sinni. Janus Daði skoraði eitt mark.
- HBW Balingen-Weilstetten, liðið sem Daníel Þór Ingason leikur með tapaði með sex marka mun á heimavelli, 30:24, fyrir ASV Hamm-Westfalen í þýsku 2. deildinni í gær. Daníel Þór skoraði ekki mark í leiknum. Honum var í tvígang vikið af leikvelli auk þess sem hann átti eina stoðsendingu.
- Elmar Erlingsson skoraði tvö mörk, annað úr vítakasti, þegar lið hans, HSG Nordhorn-Lingen tapaði á heimavelli fyrir HC Elbflorenz 2006, 34:30. Litháinn Mindaugas Dumcius sem eitt sinn lék með Akureyri handboltafélagi, skoraði eitt mark fyrir HC Elbflorenz sem er frá Dresden.
- Balingen og Nordhorn hafa tvö stig hvort lið eftir þrjár umferðir í þýsku 2. deildinni. Stöðuna í deildinni og í fleiri deildum evrópsks handknattleiks er að finna hér.
- Auglýsing -
