- Hlynur Leifsson verður eftirlitsmaður á leik Færeyinga og Svisslendinga í fyrstu umferð C-riðils Evrópumóts 20 ára landsliða karla í Slóveníu klukkan 10 í dag. Þar með er ekki öll sagan sögð því Hlynur verður einnig eftirlitsmaður á leik Spánar og Frakklands síðar í dag. Leikurinn er einnig hluti af keppni í C-riðli mótsins.
- Sigurður Hjörtur Þrastarson og Svavar Ólafur Pétursson dæma viðureign Þýskalands og Serbíu í fyrstu umferð B-riðils Evrópumótsins í handknattleik 20 ára landsliða karla í Slóveníu. Þeir félagar geta sofið út því leikurinn á ekki að hefjast fyrr en klukkan 17.
- Danska landsliðið í handknattleik karla varð fyrir áfalli í gær þegar Mads Hoxer meiddist á ökkla og varð að draga sig út úr landsliðinu sem tekur þátt í Ólympíuleikunum í París. Hoxner, sem er örvhent skytta, lék afar vel með Aalborg Håndbold á síðustu leiktíð og blómstraði í úrslitahelgi Meistaradeildarinnar í Köln í byrjun júní.
- Hans Lindberg tekur sæti Hoxer í danska Ólympíuhópnum en hann hafði áður dregið sig út úr Ólympíuhópnum síðla í júní þegar faðir hans Tómas Erling Lindberg Hansson lést.
- Rífandi góð sala hefur verið í árskortum hjá danska úrvalsdeildarliðinu Fredericia Håndbold sem Guðmundur Þórður Guðmundsson þjálfar og Arnór Viðarsson og Einar Þorsteinn Ólafsson leika með. Fredericia Håndbold lék til úrslita um danska meistaratitilinn í vor.
- Fredericia Håndbold sagði frá því í gær að hver fari að verða síðastur að tryggja sér árskort á heimaleiki liðsins á næsta tímabili. Aðeins eru innan við 50 miðar eftir. Þetta er um 15% meiri sala en á sama tíma í fyrra. Frábær árangur Fredericia Håndbold undir stjórn Guðmundar Þórðar síðustu tvö ár hefur svo sannarlega laðað fleiri stuðningsmenn í Thansen-keppnishöllina en áður var.
- Fyrsti heimaleikur Fredericia Håndbold verður við Skjern 15. september. Níu dögum áður sækir liðið TTH Holstebro heim í fyrstu umferð dönsku úrvalsdeildarinnar. Arnór Atlason er þjálfari TTH Holstebro.