- Auglýsing -
- Janus Daði Smárason skoraði fjögur mörk fyrir Pick Szeged er liðið vann FTC, 33:30, í Búdapest í kvöld í viðureign liðanna í ungversku úrvalsdeildinni í handknattleik. Með sigrinum færðist Pick Szeged á ný upp í efsta sæti deildarinnar með 25 stig eftir 15 leiki. One Veszprém er stigi á eftir en hefur leikið þremur leikjum færra.
- Benedikt Gunnar Óskarsson skoraði fjögur mörk og gaf fimm stoðsendingar í öruggum sigri Kolstad á Nærbø, 36:26, í norsku úrvalsdeildinni í handknattleik í kvöld. Sigvaldi Björn Guðjónsson lék ekki með Kolstad vegna meiðsla. Sigurjón Guðmundsson var um skeið í marki Kolstad í leiknum og varði 2 skot, 12%.
- Kolstad hefur eins stigs forskot á Elverum í efsta sæti norsku úrvalsdeildarinnar eftir 13 umferðir.
- Úlfar Páll Monsi Þórðarson skoraði eitt mark í öruggum sigri RK Alkaloid, 39:33, í heimsókn til HC Prilep í 15. umferð úrvalsdeildarinnar í Norður Makedóníu í kvöld. RK Alkaloid er í þriðja sæti deildarinnar með 23 stig eftir 15 leiki. Vardar er efst með 28 stig þrátt fyrir tap í kvöld fyrir RK Eurofarm Pelister, 28:23, í Bitola.
- Ísak Gústafsson skoraði fjögur mörk úr fjórum skotum þegar lið hans TMS Ringsted gerði jafntefli við HØJ, 32:32, í viðureign liðanna á Sjálandi í kvöld í dönsku úrvalsdeildinni í handknattleik. Guðmundur Bragi Ástþórsson skoraði tvö mörk fyrir TMS Ringsted og gaf þrjár stoðsendingar. TMS Ringsted er næst neðst með 10 stig að loknum 16 leikjum og er stigi á eftir Fredericia og Nordsjælland. Fredericia á leik til góða.
- Arnór Atlason og liðsmenn hans í TTH Holstebro töpuðu í kvöld fyrir Skjern í grannaslag í 16. umferð dönsku úrvalsdeildarinnar, 27:25. Leikið var í Skjern. Jóhannes Berg Andrason skoraði eitt mark fyrir Holstebro-liðið sem situr í sjöunda sæti með 17 stig eftir 16 leiki.
- Annan leikinn í röð var Einar Bragi Aðalsteinsson ekki með IFK Kristianstad þegar liðið sótti Önnereds heim til Gautaborgar í sænsku úrvalsdeildinni í kvöld. Liðin skildu með skiptan hlut, 31:31. IFK er áfram í þriðja sæti deildarinnar.
- Staðan vítt og breidd í deildum evrópsks handknattleiks er að finna hér.
- Auglýsing -
