- Auglýsing -
- Handknattleikskonan Karen Helga Díönudóttir hefur verið lánuð til Selfoss út keppnistímabilið. Karen Helga, sem er þrautreynd á handknattleikvellinum, er félagsbundin Haukum en hefur ekkert leikið með liði félagsins á keppnistímabilinu.
- Ingibjörg Gróa Guðmundsdóttir, markvörður, hefur verið lánuð til Gróttu frá HK til loka leiktíðarinnar. Ingibjörg Gróa var með Gróttu í fyrsta sinn á föstudaginn þegar liðið vann ÍR í Grill 66-deildinni. Frestur til þess að fá leikmenn að láni eða að kalla þá til baka úr láni rennur út um mánaðamótin.
- Jesper Jensen hefur endurnýjað samning sinn um þjálfun danska kvennalandsliðsins fram til ársins 2026. Lars Jørgensen, aðstoðarþjálfari, hefur einnig staðfest nýjan samning við danska handknattleikssambandið.
- Um leið og tilkynnt var um nýjan samning Jensen við danska handknattleikssambandið kom fram að hann ætlar ekki að endurnýja samning sinn við Esbjerg þegar núverandi samningur rennur út eftir rúmt ár. Jensen verður þar með í fullu starfi sem landsliðsþjálfari kvenna frá miðju næst ári. Nokkuð hefur verið gagnrýnt í Danmörku að Jensen þjálfi félagslið á sama tíma og hann er landsliðsþjálfari.
- Bojana Popovic hefur framlengt samning sinn um þjálfun kvennalandsliðs Svartfjallalands. Nýr samningur gildir fram yfir Ólympíuleikana sumarið 2024 ef landsliðið vinnur sér inn keppnisrétt á leikunum.
- Petar Nenadic hefur verið leystur undan samning hjá ungverska handknattleiksliðinu Veszprém sem Bjarki Már Elísson leikur með. Samningur Nenadic við félagið átti að renna út í vor. Hermt er að slegið hafi í brýnu á milli Nenadic og Momir Ilic þjálfara með þeim afleiðingum að Nenedic var settur út úr liðinu gegn Porto í Meistaradeildinni í síðustu viku. Hermt er að Nenadic gangi til liðs við Dinamo Búkarest í sumar.
- Auglýsing -
