- Auglýsing -
- Kurr er sögð ríkja í herbúðum sænska liðsins Kristianstad HK, andstæðinga Vals í Evrópubikarkeppninni í handknattleik kvenna. Eftir hvert tapið á fætur öðru í síðustu leikjum er sögð ríkja megn óánægja með Bjarne Jakobsen þjálfara liðsins, eftir því sem fram kom í Kristianstadsbladet í gær. Talið er að Jakobsen sé valtur í sessi.
- Kristianstad HK hefur aðeins unnið tvo af fyrstu sex leikjum sínum í deildinni auk þess sem liðið tapaði fyrir Önnereds í átta liða úrslitum bikarkeppninnar á dögunum. Ofan á annað þá er Kristianstad þremur mörkum undir eftir fyrri viðureignina við Val í 32-liða úrslitum Evrópubikarkeppninnar hér á landi um síðustu helgi. Liðin mætast aftur í Kristianstad á laugardaginn kl. 13. Áður en að þeim kemur mætir Västerås í sænsku úrvalsdeildinni á heimavelli í kvöld.
- Tvær íslenskar konur leika með Kristianstad, Berta Rut Harðardóttir og Jóhanna Margrét Sigurðardóttir.
- Hinar þrautreyndu hollensku handknattleikskonur Estavana Polman og Laura van der Heijden eru afar vonsviknar yfir að hafa ekki verið valdar í EM-hópinn að þessu sinni. Sú síðarnefnda hefur verið í landsliðinu í 17 ár og leikið 289 landsleiki.
- Heijden segir það vera kalda kveðjur hjá nýjum landsliðsþjálfara hollenska landsliðsins, Henrik Signell, að segja ferlinum lokið með landsliðinu í stuttu símtali. „Ég hef aldrei hitt manninn né æft undir hans stjórn,“ segir Heijden í samtali við RTV í Utrecht.
- Heijden segir ennfremur að velja eigi bestu leikmenn hverju sinni óháð aldri. Hollenska landsliðið verður fyrsti andstæðingur Íslands á EM í Innsbruck 29. nóvember en vonir standa til þess að landsliðshópur Íslands fyrir mótið verið opinberaður í dag.
- Auglýsing -
